Prokurorja e SPAK Doloreza Musabelliu deklaroi në konferencën për mediat se mega operacioni i finalizuar mëngjesin e sotëm në bashkëpunim me Policinë e Shtetit ka pasur nën hetim ngjarje kriminale të ndodhura nga viti 2011 deri në vitin 2022.
Ajo tha se janë tetë grupe kriminale në Tiranë, Durrës dhe Elbasan. “Ngjarjet kanë një shtrirje të gjatë kohore. Nga viti 2011 deri në vitin 2022. Ju e kuptuar se një pjesë janë ekzekutuar dhe një pjesë ende jo dhe nuk mund të japim më shumë të dhëna. Janë tetë grupe kriminale në Tiranë, Durrës dhe Elbasan”, u shpreh ajo.
Kreu i SPAK Arben Kraja nënvizoi se operacion është ende në zhvillim e sipër duke mos pranuar të japë detaje. Ai nënvizoi se janë identifikuar krerët e grupeve kriminale dhe rolet e secilit anëtar.
“Duhet të keni parasysh se policia vazhdon të jetë në aksion dhe proces. Nuk kemi analizë pse është kapur njëri dhe nuk është kapur tjetri. Për sa kohë kemi evidentuar grupet kemi edhe rolet e secilit”, deklaroi Arben Kraja.
Drejtori i Policisë së Shtetit Gledis Nano deklaroi se operacioni i sotëm ka qenë një punë e vijuar që prej nisjes së ngjarjeve kriminale që janë hetuar.
g.kosovari
