Bashkia e Kamzës, e drejtuar nga Xhelal Mziu ka bërë sërish “bujë” pas publikimit të një emaili ku në emër të kësaj bashkie kërkohen 3 persona, për tu punësuar si “Ambasadorë” të Kamzës. Në email shkruhet se “oferta” e punës është origjinale, por nga ana tjetër, nuk ka asnjë pagesë, pasi është “me baza vullnetare”.
Ja çfarë shkruhet në email:
Bashkia e Kamzës kërkon persona të motivuar që jetojnë jashtë dhe janë njohës shumë të mirë të anglishtes, italishtes, frëngjishtes ose gjermanishtes.
Duke filluar nga dhjetori i vitit 2015, Bashkia e Kamzës do të kërkojë tre “Ambasadorë” që ta përfaqësojnë në qytete të ndryshme të BE-së dhe të ndihmojnë me promovimin e vlerave dhe traditave dhe mbi të gjitha të promovojnë mundësitë për investime në Kamëz.
Misioni i tyre do të jetë të nxisë binjakëzimet, të lehtësojë dhe të diversifikojë tregtinë ndërmjet këtyre qyteteve, të realizojë shkëmbimet mes institucioneve të Kamzës me ato të qytetit binjak. Ambasadorët e Kamzës do të mbështesin eksportin e produkteve vendase drejt tregjeve të huaja, si dhe do të jenë të angazhuar për një periudhë dyvjeçare mbi baza vullnetare.
Ambasadorët mund të kujdesen për organizimin e vizitave zyrtare dhe lehtësimin e procedurave administrative për studentë, biznesmenë etj.
