Nga i lënduar aksidentalisht, që ishte edhe alibia e gjyqtarit Artan Gjermeni, ai mund të përfundojë i pandehur.
Kjo pasi dëshmia e dhënë nga gjyqtari nuk duket aspak bindëse për hetuesit e policisë, të cilët dyshojnë se Gjermeni është plagosur qëllimisht, por ai nuk ka pranuar të tregojë të vërtetën para organeve ligjzbatuese.
Dyshimet lindën pasi mjekët konstatuan se gjyqtari kishte pësuar disa lëndime në trup me mjete prerëse, të cilat sipas tyre nuk mund të shkaktohen aksidentalisht.
Gjyqtari tha se ishte dëmtuar nga një llamarinë në garazhin e tij, por pasi mjekët rrëzuan këtë alibi, polici nisi veprimet e saj.
Gjatë një kontrolli të ushtruar në mjetin e gjyqtarit u konstatuan disa pika gjaku.
Po ashtu, brenda mjetit ndodheshin edhe 20 mijë euro, burimi i të cilave nuk është sqaruar.
Aktualisht policia vijon veprimet për të zbuluar origjinën e parave dhe të vërtetën mbi plagosjen e gjyqtarit.
