Ka shkuar në shtatë numri i të arrestuarve në Turqi në lidhje me sulmin kamikaz që vrau 11 persona, prej të cilëve 10 turistë dhe plagosi 15 të tjerë në zemër të Stambollit. Ministri i Brendshëm turk Efkan Ala në një konferencë për mediat dha shifrat dhe detaje për hetimet.
“Numri i atyre që u arrestuan në lidhje me sulmin e Stambollit ka arritur në shtatë dhe hetimet po zhvillohen në mënyrë të plotë”, tha ai.
Kamikazi u identifikua shpejt nga autoritet turke , madje edhe mënyra sesi ai kishte hyrë në Turqi. 28-vjeçari me origjinë nga Arabia Saudite Nabil Fadli, kishte kaluar nga Siria dhe ishte regjistruar në një qendër emigrantësh ku kishte lënë edhe të shenjat e gishtave.
Ndërkohë, qindra përfaqësues të guidave turistike u mblodhën në vendin e shpërthimit, duke vendosur lule në një memorial të improvizuar në zonën me të frekuentuar të Stambollit nga turistët. Me flamuj turk dhe gjerman në duar, ata mbajtën një minutë heshtje në nder të turistëve gjermanë që humbën jetën në sulm.
“Ky është një krim kundër njerëzimit. Sot na goditi ne, nesër mund të godasë një vend tjetër. Shpresojmë që një sulm i tillë të mos ndodhë kurrë në asnjë vend të botës. Ne presim që gjermanët të vijojnë të vizitojnë vendin tonë. Turqia është e sigurtë dhe Stambolli është i sigurt” , thotë Basaran Ulusoy, kryetar i Shoqatës së Agjencive Turistike të Turqisë.
Turqia, e cila si Gjermania është anëtare e koalicionit të udhëhequr nga SHBA kundër Shtetit Islamik në Siri dhe Irak, është kthyer në objektiv të militantëve radikale.
