Juventusi është duke menduar për përforcime, ndërsa objektivat janë nga Ligue 1, Edison Cavani dhe Bernardo Silva.
Në verë nga Juventusi pritet të largohet Alvaro Morata i cili do të rikthehet te Real Madrid për 30 milionë euro, kështu që drejtuesit e kampionëve të Italisë shikojnë te ‘El Matador’ zëvendësuesin ideal të spanjollit.
Cavani dëshiron të largohet nga Parisi dhe është i gatshëm te transferohet te Juventusi, por problemi për bardhezinjtë qëndron te fakti se uruguaiani kushton shumë dhe ka një pagë të lartë.
Megjithatë te Juve janë të gatshëm ta bëjnë një sakrificë ekonomike për një lojtar si ai, për të formuar një dyshe sulmuese të gjithën amerikano-jugore me Cavanin dhe Dybalan.
Përsa i përket afatit kalimtar të janarit, Allegri ka kërkuar një përforcim në mesfushë dhe lojtari i përzgjedhur nga drejtuesit bardhezinj është talenti portugez i Monacos, Bernardo Silva.
Dy klubet kanë arritur një akord për huazimin e futbollistit për 6 muajt e ardhshëm, por problemi qëndron te shuma që do ta paguajë Juventusi për ta blerë përfundimisht 21-vjecarin në verë.
Bardhezinjtë ofrojnë nga 20 deri në 22 milionë euro, ndërsa Monaco kërkon 30 milionë euro, megjithatë edhe në këtë rast mund të gjendet një rrugë e mesme që ky operacion të mbyllet me sukses.
