Procedurat koncesionare të inceneratorit të Elbasanit janë bërë pa u njoftuar agjencia e Prokurimeve Publike, fakt që u pohua nga drejtoresha e kësaj agjencie në komisionin hetimor. Por, deputetja Anila Denaj tha se procedurat janë bërë në kushtet e një emergjence të mbartur mjedisore.
Jorida Tabaku: Në dijeninë tuaj kjo procedurë si u zbatua?
Jorida Tabaku: Si ka mundësi që është denoncuar publikisht, është folur vazhdimisht për këtë ju nuk e keni monitoruar?
Reida Kashta APP: Sepse nuk kemi një rekord për një procedurë të tillë koncensionare. Pra, nuk kemi asnjë komunikim të mëtejshëm për APP për këtë objekt.
Pas kësaj përgjigje të drejtoreshës së Agjencinë e Prokurimit Publik, deputetja e PD Jorida Tabaku në deklaratë për mediat tha se kjo procedurë është në shkelje flagrante të ligjit.
“Të gjithë inceneratorët kanë qenë në shkelje të ligjit. Janë tenderuar para për inceneratorë që nuk ekzistojnë. Të treja procedurat janë korruptive dhe për pasojë edhe zbatimi i kontratës koncesionare janë korruptive”, tha Tabaku.
Për këtë akuzë përgjigjen e dha deputetja e PS Anila Denaj, e cila tha se gjithçka është bërë në kushtet e emergjencës mjedisore.
“Dëshmitarët sot konfirmuan se procedurat janë të lidhura me emergjencat, të cilat janë të lidhura me një situatë të trashëguar të menaxhimit të mbetjeve. emergjenca e Elbasanit dihet dhe është e vërtetuar me dokumente nga organet kompetente. ndaj është e rëndësishme që të lejojmë dokumentet që do të flasin përpara se të flasim me opinione të parakohshme nga përfaqësues të partive politike”, tha Denaj.
Komisioni hetimor për impiantet e trajtimit të mbetjeve urbane, do të zgjasë deri më 25 shkurt, ku edhe në ditët e ardhshme do të zhvillohen seanca me dëshmitarë të tjerë që kanë dijeni për 3 kontratat e inceneratorëve. Shqiptarja.com
