Tre persona janë arrestuar nga policia e Korçës duke e çuar në 10 numrin e personave të arrestuar në kuadër të operacionit “Restart”. Gjatë aksionit të policisë janë vënë në pranga Ertin Hoxhalli 35 vjeç, Kastriot Hoxha 42 vjeç dhe Zarif Beqiri 53 vjeç.
Ndërkohë janë sekuestruar 70 kg kanabis duke e çuar sasinë e lëndës narkotike të sekuestruar në 322 në total.
Sipas bluve të arrestuarit në bashkëpunim me njëri tjetrin prodhonin kanabisin në Pojan dhe Maliq të Korçës dhe më pas e trafikonin atë drejt shtetit grek. Në momentin e arrestimit atyre iu gjetën lëndë narkotike dhe armë.
“Si rezultat i informacioneve të grumbulluara se shtetasit e mësipërm në bashkëpunim mes tyre ushtronin aktivitetin e paligjshëm të prodhimit dhe shitjes së narkotikëve në fshatrat e Njësisë Administrative Pojan, Maliq, trafikimit të tyre në drejtim të shtetit grek si edhe posedonin armë pa leje, shërbimet e policisë organizuan punën, bënë lokalizimin e personave dhe ushtruan kontrolle në banesat e tyre, në fshatrat Zëmblak dhe Kurilë.
Konkretisht gjatë kontrollit të ushtruar në banesën e shtetasit E. H., forcat e policisë gjetën dy pako me lëndë të dyshuar narkotike kanabis me peshë 1.5 kg dhe 1 peshore elektronike, në banesën e shtetasit K. H., u gjet 1 armë zjarri tip automatik, me një krehër të vendosur në folenë e tij, me 9 fishekë pa leje, si edhe në banesën e shtetasit Z. B., janë gjetur 126 pako, me lëndë të dyshuar narkotike kanabis me peshë totale 70 kg, të cilat u sekuestruan në cilësinë e provës materiale”, thuhet në njoftimin e policisë.
Materialet i kaluan Prokurorisë së Rrethit Gjyqësor Korçë për veprat penale “Trafikimi i narkotikëve”, e mbetur në tentativë, “Prodhimi dhe shitja e narkotikëve” dhe “Mbajtja pa leje dhe prodhimi i armëve, armëve shpërthyese dhe i municionit”.
g.kosovari
