Shenjat e gishtërinjve që i gjetën në minën me celular të montuar në makinën e ishprefektit të Qarkut të Vlorës nuk i përkasin të pandehurit Marjon Mitro, vlonjatit që akuzohet si porositës i krimit, që është klasifikuar si vepër me qëllime terroriste mbetur në tentativë, që ka synuar vrasjen e shtetasit Besnik Dervishi.
Në seancën e djeshme gjyqësore në Gjykatën e Krimeve të Rënda ndaj Julian Sinanajt, i cilësuar si vrasës me pagesë dhe të pandehurve të tjerë, u administrua një aktekspertim ku thuhej se gjurmët e gishtave të gjetura në telefonin dhe mekanizmin shpërthyes, që u zbulua në pjesën e poshtme të autoveturës së Dervishit, nuk janë të njëjta me ato të Marjon Mitros.
Në fakt, ka qenë i penduari i bandës, Julian Sinanaj, i cili ka deklaruar se mina me celular është prodhuar prej tij me kërkesë të Marjon Mitros. Sinanaj thekson se me Mitron është njohur me ndërmjetësinë e Genis dhe Andon Mehillajt dhe se me të komunikonte përmes postës elektronike.
Telefonin celular dhe kartën që ka përdorur për të prodhuar minën, Sinanaj thekson se e ka blerë në tregun çam në Tiranë në fillim të dhjetorit 2013. Po këtë muaj Sinanaj shprehet se ia ka dorëzuar minën Marjon Mitros në afërsi të “Zogut të Zi” në Tiranë.
Por, kur Prokuroria e Krimeve të Rënda e kishte vënë me “shpatulla pas muri” Mitron, aktekspertiza duket vjen në favor të të pandehurit, pasi shenjat e gishtërinjve rezulton t’i përkasin një tjetër personi.
Në fakt, ky moment ngre dyshime se në përgatitjen e aktit ndaj besnik Dervishit, që për fat mbeti në tentativë, mund të ketë edhe të tjerë persona të implikuar, të cilët nuk janë identifikuar ende.
Prokuroria këmbëngul se Marjon Mitro bashkë me Sinanajn kanë kryer veprën me qëllime terroriste, pasi mina me telekomandë u zbulua e montuar në makinën e ishprefektit në hyrje të Kryeministrisë.
Veç dëshmisë së Sinanajt, prova tjetër e fortë që prokuroria ka në duar kundra Marjon Mitros, është një mesazh që ky i fundit i ka çuar ishprefektit Dervishi. Sipas prokurorisë, një ditë pas arrestimit të Julian Sinanajt, i pandehuri Mitro i ka çuar SMS Dervishit në një kohë që ata nuk kishin asnjë njohje me njëritjetrin.
Ndërkohë në vijim të seancës, Gjykata e Krimeve të Rënda administroi si provë material një video ku shfaqet Julian Sinanaj, duke rrëfyer krimet e bandës, mes të cilave katër vrasje dhe vendosjen e tri minave me celular.
Avokatët e të pandehurve kanë këmbëngulur që video të mos merret si provë, pasi është marrë në kundërshtim me ligjin dhe se Sinanaj ka folur nën presion. Kërkesa e avokatëve është e rrëzuar dhe videoja është bërë pjesë e fashikullit të gjykatës.
Të pandehurit Julian Sinanaj, i penduar i bandës; Ndriçim Gjokona, gjithashtu i mbrojtur; Marjon Mitro, Andon Mëhillaj, Genis Mëhillaj, Albin Mexhaj e biznesmeni Ilir Karcini akuzohen për krime të rënda, që nga vrasja e peshkatarit Sokol Veizi, të biznesmenit Agron Çela, vendosjen e tritolit në banesën e ishdeputetit të PDsë, Ardian Kollozi, vendosja e minës me celular në makinën e ishprefektit të Vlorës, Besnik Dervishi e deri tek planifikimi i vrasjes së biznesmenit Piro Bare.
GSH
