Megjithëse nga viti 1995 deri në 2013 Elton Kranja është dënuar plot 11 herë nga gjykata e Tiranës për akuzën e vjedhjes sërisht 49 vjeçari nuk ka hequr dorë nga zanati i vjetër, duke vjedhur 9 biçikleta në Tiranë.Për këtë vjedhje një muaj më parë gjykatës së Tiranës ju desh të dënonte për herë të 12 të pandehurin Kranja, me një dënim prej 5 vjet heqje lirie.
Por duke qënë se Kranja ka pranuar gjykimin e shkurtuar ai ka përfituar uljen e dënimit, duke u dënuar përfundimisht me 3 vjet e 4 muaj heqje lirie.Nga hetimet e prokurorisë ka rezultuar se në datën 6 gusht 2015, policia gjyqësore ka kryer ndalimin e të pandehuritt Elton Kranja, pasi në kohë dhe vende të ndryshme, në qytetin e Tiranës, ka vjedhur 9 biçikleta, të cilat i ka shitur. Pesë nga biçikletat e vjedhura u përkasin shtetasve Eljo Kamberaj, Ledjan Lato, Xhejms Ndoj, Endri Mele dhe Artin Priska, të cilët janë pyetur si deklarues dhe kanë shpjeguar rrethanat e vjedhjes dhe karakteristikat e biçikletave të vjedhura.
Nga ana tjetër pas ndalimit, shtetasi Elton Kranja, ka shpjeguar se, ka qënë i dënuar disa herë për vjedhje dhe se biçikletat i vidhte për t’i shitur që të fitonte para, pasi është përdorues i lëndëve narkotike.
Dëmi 2.5 milion lekë
Lidhur me këtë ngjarje policia gjyqësore ka kryer verifikimin në vend dhe ka identifikuar si blerës të biçikletave të vjedhura nga ky autor 9 persona si Shaqe Cokaj, Taulant Krasniqi, Muharrem Gezdari, Denis Vladi, Edvin Shabani, Kujtim Muçaj, Denis Hima, Drini Lamaj dhe Briken Krasniqi. Të gjithë këta persona janë pyetur si deklarues dhe kanë shpjeguar se biçikletat i kanë blerë nga i pandehuri Elton Kranja, pa ditur se ato ishin të vjedhura. Është kryer ekspertim vlerësues për biçikletat e vjedhura dhe ka rezultuar se ato kapin një vlerë të përgjithshme prej 250.000 lekësh.
Elton Kranja është paraqitur përpara gjykatës tepër i penduar dhe ka kërkuar gjykim të shkurtuar në gjëndjen që janë aktet.Ndërkohë në caktimin e masës së dënimit gjykata ka mbajtur parasysh rrezikshmerinë shoqërore të veprës penale dhe të autorit, se i pandehuri pranon akuzën e ndjehet shumë i penduar, si dhe faktin që sipas vërtetimit të gjëndjes gjyqësore i pandehuri Elton Kranja, gjatë periudhës kohore 1995-2013, është dënuar 11 herë, nga të cilat një herë për vjedhje me dhunë dhe 10 herë për vjedhje ose vjedhje të kryer në bashkëpunim apo më shumë se një here. Shqiptarja.com
