Clarisse Lafleur është një nga fëmijët e pasur të Instagramit, vajza e një miliarderi, e cila ekspozon në rrjetet sociale fotografitë nga jeta e saj luksoze.
Megjithatë australiania thotë se i vjen zor të tregojë se sa shpenzon vetëm për rrobat e saj. 18-vjeçarja pranon se shpenzon për rroba e bizhuteri aq sa mund të fitojnë shumica e njerëzve gjatë një viti.
Ajo fluturon me aeroplan privat, i bën pushimet në super-jahtin e saj dhe dizajnerët e preferuar janë Christian Louboutin, Karl Lagerfeld dhe Valentino Garavani.
Për këtë stil jetese paguan babai i saj, por vajza thotë se mezi pret të fillojë punë që të fitojë vet paratë që i duhen. Adoleshentja aktualisht studion për biznes në një universitet në Australi.
“I kuptoj plotësisht njerëzit që na përgjithësojnë dhe që e perceptojnë stilin tonë të jetesës në mënyrë negative. Të jesh i pasur nuk do të thotë të hedhësh paratë kudo dhe të veshësh disa rroba firmato dhe bizhuteri të shtrenjta. Kështu nuk dukesh i pasur, dukesh si një pemë Krishtlindjesh. Duhet të kesh edhe kulturën, ndryshe njerëzit do qeshin me ty”.
“Sa budallaqe dukesh kur ke veshur gjëra kaq të shtrenjta, por nuk mund të bësh diferencën mes një vere të mirë dhe një vere të keqe. Kam parë vajza të veshura me rroba të shtrenjta, por nuk dinë se cila gotë përdoret për të pirë shampanjën”.
Babai i Clarisse ka qenë politikan dhe ka në pronësi fabrika letrash dhe plastike, hotele, restorante dhe një gazetë. Pasi të mbarojë universitetin, ajo thotë se do merret me biznesin e babait.
“Dua ta diversifikoj akoma më shumë. Jam shumë e interesuar për modën, i di tendencat e reja dhe se si promovohen produktet. Më vjen zor të tregoj sa shumë shpenzoj për rroba dhe aksesorë. Shumë njerëz nuk i shpenzojnë kaq në një vit”.
“Megjithatë njerëzit në rrjetet sociale më shohin si një shënjestër të lehtë, pasi jam bionde e re. Disa më quajnë budallaqe, të tjerët më thonë se jam kurvë. Dikush më tha se do donte që të më zinte kanceri”.
“Por unë dhe disa të tjerë e shohim Instagramin thjesht si një ditar të jetës sonë. Bëjmë gjëra të mira dhe disa njerëz duan ta shohin këtë. Ka njerëz që më falënderojnë, pasi thonë se i frymëzoj të punojnë më shumë në jetë, që të bëjnë këtë stil jetese”.
“Në fund të fundit, kush jeni ju që gjykoni se çfarë postojnë të tjerët? Është jeta dhe reputacioni i tyre. Nëse doni, mos më ndiqni”, ka deklaruar 18-vjeçarja.
