Kur nga zgjedhjet parlamentare na ndajnë pak më shumë se 2 muaj, kryetarja e Komisionit të Integrimit, Jorida Tabaku, deklaron se 11 maji përbën një prej kushteve kryesore në rrugën e integrimit të Shqipërisë në Bashkimin Europian.
Tabaku sjell në vëmendje se nuk mund të ketë anëtarësim në BE pa garantuar standardet e zgjedhjeve, hetimin dhe ndëshkimin e krimeve elektorale si dhe transparencën e financimit të partive politike.
“Standardet e zgjedhjeve të 11 majit janë elementi i parë dhe i vetëm që lidhet me grupkapitullin e parë, institucionet demokratike. Që kanë qenë që në vitin 2013 kriter i parë, në vendimin e Këshillit në mars të vitit 2020 kanë qenë përsëri kriter i parë, dhe vazhdojnë e mbetet kriter i parë për disa arsye. E para standardet e institucioneve demokratike lidhen me zhvillimin e zgjedhjeve, së dyti hetimi i krimeve zgjedhore dhe besoj që të gjithëve ju kujtohet që dosja ‘184’ dhe ‘339’, Dibra dhe Durrësi kanë qenë pjesë e vendimit të Këshillit dhe detyrim hetimi i tyre i plotë”, tha Tabaku.
Kryetarja e Komisionit të Integrimit thekson se të hapësh negociatat për kapituj nuk mjafton e se duhen plotësuar kriteret për të qenë vend anëtar i BE.
“Tashmë që pozicionet negociuese janë hapur dhe tashmë që Shqipëria duhet të negociojë, përfaqësuesit e BE duhet të vijnë në Tiranë për të parë se si janë në terren se si zbatohen detyrimet ndaj BE-së. Për këtë arsye do ta përdorim procesin e integrimit, për të rritur ndërgjegjësimin ndaj problematikave që kemi sot”, shtoi Tabaku.
Por, edhe pse premtimi për të anëtarësuar Shqipërinë në BE është premtimi kryesor i kryeministrit Edi Rama dhe PS, Tabaku beson se këtë proces do ta çojë përpara vetëm Partia Demokratike.
“PD ka qenë ajo që e ka nisur këtë proces, PD do ta përfundojë këtë proces, për këtë nuk ka asnjë dyshim”, deklaroi ajo.
Gjatë procesit të hapjes së negociatave, PD ka zgjedhur të mos votojë kundër për të treguar mbështetje për integrimin, por ka refuzuar të votojë pro pasi mendon që qeveria nuk po e udhëheq këtë proces në mënyrën e duhur.
