Zgjedhjet e 11 majit kanë qenë sërish kryefjalë e deklaratës së kryedemokratit Sali Berisha në konferencën e sotme për gazetarët. Ndërsa nuk kursen akuzat për blerje votash dhe manipulime me procesin e votimit të diasporës, Berisha ka akuzuar kreun e KQZ, Ilirjan Celibashi se ka bashkëpunuar me postën për të mos i dorëzuar opozitës dokumentacionin e këtij procesi.
“Celibashi po bëhet bashkëfajtor me DHL-në sepse nuk na dorëzohen dokumentet e dorëzimit të votave nga qytetari tek DHL-ja dorëzim që bëhet me firmë. Domethënë votat nuk janë dorëzuar nga qytetarët, janë mbushur në zyrat e PS, nuk ka diskutim ajo.
Gjersa ata e fshehin, nuk kanë firmat e qytetarëve. Rruga që ndjekim është, ne përsëritëm kërkesën dhe tani do përcaktojmë rrugën që do ndjekim. Por çfarë gjejmë ne? Ne gjejmë në bashkëautorësi Edi Ramën me udhëzimet që ka dhënë në kundërshtim me kontratën, dhe Ilirjan Celibashin, i cili duhet me çdo kusht të dorëzojë dokumentet”, deklaroi Berisha.
Ky i fundit theksoi se opozita do të ndjekë të gjithë mekanizmat e nevojshëm për atë që e cilëson si shkelje e autonomisë vendore.
“Letra e tyre është një akt përgjegjësie ndaj qytetarëve shqiptarë, ndaj kushtetutshmërisë së vendit.
Ata kanë informuar në radhë të parë Këshillin e Europës dhe Kongresin e Autoriteteve Rajonale dhe Lokale sepse Shqipëria ka firmosur kartën dhe po shkel me dy këmbët kartën.
Sigurisht që ne këtë do ta ndjekim me të gjithë mekanizmat tonë që kemi. Përfaqësuesit tanë në Këshillin e Europës do ta kenë një çështje të rëndësishme shumë në agjendën e tyre”, tha Berisha.
