Sulmuesi bëhet gati për t’u transferuar në Itali me bekimin e trajnerit De Biazi Fillojnë ofertat e para konkrete për Shkëlzen Gashin, i cili do të largohet në janar nga Bazeli. Sulmuesi i kombëtares shqiptare është kthyer në objektiv të merkatos së klubeve italiane dhe një prej tyre, Torino, ka bërë një ofertë konkrete për 27-vjeçarin i cili në dy edicionet e kaluara të kampionatit zviceran u shpall golashënuesi më i mirë. Torinezët kanë një aleat të fortë në luftën për të siguruar kartonin e futbollistit, trajnerin e kombëtares shqiptare, Xhani De Biazi, i cili ka një lidhje të ngushtë me drejtuesit e këtij klubi.
Pak ditë më parë, De Biazi deklaroi për mediat zvicerane se Gashi ishte pranë largimit nga Bazeli pasi ishte e pakuptimtë që të qëndronte te klubi aktual për sa kohë që trajneri Urs Fisher nuk e kishte në konsideratë dhe nuk e aktivizonte. Trajneri është shprehur vazhdimisht në të kaluarën se Gashi është një lojtar që do të mund të tregonte vlerat e tij edhe në Serinë A, këshillë që duket se është ndjekur nga klubet italiane. Gjatë verës ishin Lacio dhe Fiorentina që shfaqën interes për futbollistin, por Bazeli nuk ishte i gatshëm të shiste sulmuesin. Pas vendimit të trajnerit Fisher për të mos aktivizuar Gashin, tanimë kampionët e Zvicrës janë gati ta lënë atë të largohet. Duke pasur parasysh se për futbollistin ka shumë kërkesa, klubet kanë filluar të paraqiten me oferta konkrete në adresë të Bazelit.
Sipas “Fussballinfos.ch”, oferta e parë që ka mbërritur është ajo e Torinos, që ka bërë gati një çek prej 4 milionë eurosh për të siguruar transferimin e Gashit. Bazeli e vlerëson aktualisht 4,5 milionë euro sulmuesin, ndaj oferta e torinezëve është e kënaqshme, por pret që në garë të futen edhe klube të tjera në mënyrë që të rrisë fitimet nga shitja e Gashit të cilin e bleu nga Grasshoper për 1,5 milionë euro në verën e vitit 2014. Vlera e kartonit të lojtarit arriti deri në 7 milionë euro në verë, por mosaktivizimi bëri që ajo të binte gjatë muajve të fundit.
Torino do të ishte një zgjedhje optimale sportive për Gashin, pasi trajneri Ventura aplikon një skemë ku sulmuesit e krahut janë thelbësorë për fazën ofensive. Për më tepër, klubi është i gatshëm që të presë ambientimin e sulmuesit shqiptar me ritmin e kampionatit italian, pasi është në dijeni të plotë të aftësive të tij, falë informacioneve që i ka servirur De Biazi. Ky i fundit vazhdon të mbajë lidhje shumë të ngushta me Torinon, të cilin e ka drejtuar gjatë karrierës së tij, ndërsa ka pranuar se i ka bërë disa sugjerime drejtuesve të këtij klubi për lojtarë të kombëtares shqiptare që ai mendon se mund të ndihmojnë në rritjen e mëtejshme të torinezëve. Fakti se Torino ka bërë menjëherë një ofertë për Gashin, vërteton se ai ishte në këtë listë të përpiluar nga trajneri De Biazi, edhe pse ky i fundit, një vit më parë nuk e shihte 27-vjeçarin si pjesë të planeve të tij. Megjithatë, trajneri ka ndryshuar plotësisht opinion, arsye pse tashmë po bën maksimumin për të ndihmuar kalimin e lojtarit drejt një klubi ku ai të aktivizohet rregullisht dhe të jetë në formë sa më të mirë për Euro 2016. /Shqip
