Qeveria ka vendosur të rrisë pensionin për disa artistë dhe sportistë. Sipas vendimit të Këshillit të Ministrave të publikuar në Fletoren Zyrtare, Elena Kadare, Moikom Zeqo, Isa Tare, Kristaq Leno, Kujtim Kasmi, Nestor Jonuzi, Neptun Bajko, Koço Çomi, Aziz Tahiri, Hektor Dule dhe Kreshnik Tartari, do të marrin shtesë në pensionin e tyre në masën 27 mijë lekë të reja.
Por pensioni sipas qeverisë nuk mund të jetë më i lartë se 54 mijë lekë të reja.
“Dhënie shtesë pensioni të posaçëm shtetëror në masën e katërfishit të pensionit social, por shuma e pensionit, që i takon sipas ligjit nr. 7703, datë 11.5.1993, plus këtë shtesë, të mos kalojë tetëfishin e pensionit social”, – thuhet në vendimin e Këshillit të Ministrave. Masa e pensionit social është 6750 lekë.
Të gjithë emrat e mësipërm kanë kontribuar në fusha të ndryshme dhe janë vlerësuar me medalje dhe çmime.
