Një vit e gjysmë në Serie A i ka mjaftuar Elseid Hysajt për të fituar zemrat e tifozëve si një nga mbrojtësit më të mirë të Italisë.
Lojtari kuqezi ka siguruar një vend në formacionin e vitit 2015, votuar në sondazhin e lexuesve të sitit Calciomercato.com, të cilët e kanë preferuar atë para mbrojtësit të Romës, Alessandro Florenzi.
Viti që po mbyllet ka qenë fantastik për Hysajn, i cili në vitin debutues në Serie A me Empolin siguroi transferimin te Napoli, tashmë pretendent për titull, ndërkohë që në pak muaj më pas siguroi edhe kualifikimin me kombëtaren shqiptare në finalet e kampuionatit europian.
Një ngritje meteorike e djaloshit, i cili ka pasur admirues të shumtë që në kohën e Serisë B.
I lindur në Shkodër, nga ana sportive Hysaj është një produkt i shkollës italiane të futbollit, pasi ka shkuar në Itali në moshën 14-vjeçare dhe është rritur në skuadrat e të rinjve të Empolit.
Në sonadazhin e sitit të specializuar për tregun e futbollistëve, Hysaj është zgjedhur si mbrojtësi i djathtë më i mirë në Itali me 42 përqind të votave dhe prapa tij janë Alessandro Florenzin (Roma 33%), Bruno Peres (Torino, 17%) dhe Vrsaljko (Sassuolo, 8%).
