Veteranët e Kaçanikut edhe njëherë kanë paralajmëruar bllokimin e rrugëve në rast se nuk do të plotësohen kërkesat e tyre lidhur me fondin prej dhjetë milionë eurove i cili ende mbetet i pashfrytëzueshëm për veteranët. Po ashtu, veteranët nga Kaçaniku kanë kërkuar edhe përfitimet e tjera që u takojnë me ligj. Përfaqësuesi i veteranëve të Kaçanikut, Jeton Kuçi, ka thënë se ka dy kërkesa, njërën për ministrin e Mirëqenies dhe Punës Sociale, Arban Abrashi dhe tjetrën për kryetarin e Komisionit Qeveritar, Agim Çeku.
Kuçi ka treguar se kërkesa për ministrin Abrashi ka të bëjë me fondin prej dhjetë milionë eurove, fond ky i cili është ende i pashfrytëzueshëm për veteranët. Ai i ka dhënë 24 orë kohë ministrit Abrashi që të njoftoj se çfarë do të bëhet me këtë fond. Ndryshe, siç tha Kuçi për KosovaPress veteranët do të ndërmarrin masa radikale dhe do të bllokojnë rrugët.
“Kërkesa i drejtohet ministrit Abrashi për fondin e dhjetë milionë eurove, i cili është ende i pashfrytëzueshëm për veteranët, dhe kërkoj që nga ministri që të njoftojë brenda 24 orëve për këtë fond, a do t’i shpërndahet veteranëve në mënyrë retroaktive apo do të hiqet ky fond për këtë vit. Nëse nuk komunikon me veteranët, ne do të marrim masa radikale prapë me bllokimin e rrugëve”, tha Kuçi.
