Këtë herë ka mjaftuar “S”-ja e “MSN”-së për t’i dhuruar suksesin e radhës Barcelonës së Luis Enrique. Katalanasit, në fakt, kanë mundur pa probleme ekipin e Guanghzou Evergrande në gjysmëfinalen e Botërorit për klube dhe të dielën në 11:30 do të luajnë për trofeun kundër argjentinasve të River Plate.
Aventura e skuadrës spanjollë në Japoni nuk ka nisur aspak mirë. Fillimisht kampionët në fuqi të Champions League kanë humbur Neymar për shkak të një dëmtimi muskulor, ndërsa sot, pak orë para ndeshjes, ka ardhur lajmi se Messi ishte ndalur për shkak të një problemi në veshka dhe nuk do të ishte në dispozicion të ekipit.
Dy mungesa këto që kanë bërë të mendohet se Barcelona do të kishte vështirësi në sfidën kundër ekipit të Luiz Felipe Scolarit. Por jo, spanjollët kanë fituar me lehtësi falë Luis Suarez. “El Pistolero” ka zhbllokuar takimin në minutën e 39-të, e ka mbyllur në të 50-ën dhe ka rrumbullakosur fitoren e Barçës me një penallti në të 67-ën, duke çuar në 21 numrin e golave të tij në total me katalansit në këtë sezon në të gjitha kompeticionet./Telesport
Barcelona-Guangzhou 3-0 Shënues: Suarez 39’, 50’, 67’ (pen)
Barcelona: Bravo, Dani Alves, Pique, Mascherano, Jordi Alba (Correia 76’), Rakitic, Busquets, Iniesta (Samper 81’), Sergi Roberto (Ramirez 72’), Suarez, Munir. Trajner: Enrique.
Guangzhou: Li Shuai, Zou Zheng (Li Xuepeng 35’), Kim, Feng Xiaoting, Zhang Linpeng, Zheng Zhi, Paulinho, Huang Bowen, Ricardo Goulart, Zheng Long (Yu Hanchao 56’), Elkeson (Gao Lin 67’). Trajner: Scolari. Gjyqtar: Aguilar Karton i verdhë: Feng Xiaoting
