Nga Eduard Zaloshnja
Në mënyrë fare të vendosur, Edi Rama e ka bërë mëse të qartë se nuk ka ndërmend të japë dorëheqjen prej procesionit të përnatshëm protestor, që fillon me disa qindra qytetarë në Sheshin Skënderbej dhe përfundon me disa mijëra që marshojnë nëpër rrugët e Tiranës.
Sidoqoftë, vendosmëria e Ramës mund të tronditet nëse 100 mijë protestues pushtojnë bulevardin dhe nuk e lëshojnë atë ditë e natë. Por 100 mijë në bulevard mund të jenë vetëm kur ai të mbushet plot, nga Universiteti deri te monumenti i Skëndërbeut – mesatarisht me 2 protestues për çdo metër katror (imagjinoni 2 persona të ngujuar ditë e natë në një ashensor të vogël nga ata një-metër-katrorëshit!)
Ky skenari i 100-mijëshit në bulevard duket i parealizueshëm nga ç’kemi parë deri më sot. Po skenari i mundjes së Ramës në zgjedhje, si duket?
Nga ekstrapolimi i përafërt statistikor i një sondazhi që zhvillova për JAVANEWS (https://javanews.al/ekskluzive-sondazhi-cfare-rezultatesh-zgjedhore-do-te-kishim-nese-do-te-votohej-se-afermi/), rezultoi se rreth 755 mijë zgjedhës në Shqipëri do të votonin për një parti të re (nëse krijohet). Ky numër tregon se ekziston një rezervuar gjigand elektoral për një parti të re që do të sfidonte PS-në në zgjedhje.
Por po të gërmojmë pak më thellë në të dhënat e sondazhit, vërejmë se 4/5 e këtyre përkrahësve votuan vjet për partitë ekzistuese opozitare, kryesisht për PD-ASHM. Dhe në qoftë se në krye të partisë së re hipotetike del një grup neomarksist, ata nuk do ta votonin.
Nga ana tjetër, në qoftë se në krye të partisë së re hipotetike del një grup i ekstremit të djathtë, 1/10 e përkrahësve që votuan vjet për PS-në nuk do ta votonin partinë e re. E njëjta gjë mund të thuhet edhe për një pjesë të 5/10 që nuk votuan fare vjet.
Me pak fjalë, si teorikisht edhe praktikisht, është e pamundur që një parti e re të thithë gjithë ujin elektoral të rezervuarit të sipërpërmendur. Ndërkohë, për të mundur PS-në në zgjedhje, një partie apo një koalicioni partish i duhen të paktën 800 mijë vota brenda vendit…
Skenarët e tjerë që qarkullojnë, me futje të dhunshme në katin e parë të Kryeministrisë, apo me byzylykët e SPAK-ut në zyrën e Ramës, janë thjesht fantazmagorikë…
