Mbi 10 mijë të papunë mund të kenë një shans punësimi në sektor të ndryshëm të ekonomisë. Paralelisht me këtë kanë shansin që edhe dhjetra biznese të përfitojnë nga punësimi i një sërë kategorish përmes një programi të qeverisë për nxitjen e punësimit.
Përparësi në punësim do t’u jepet subjekteve aplikues që do të punësojnë punëmarrës nga kategori të ndryshme, grupeve të veçanta dhe në vështirësi si, jetimët, femrat, personat përfitues nga programet e mbështetjes me të ardhura, nga komuniteti rom dhe egjiptian, emigrantët e kthyer me probleme ekonomike, të papunët afatgjatë, personat me aftësi të kufizuar si dhe të rinjve të sapodiplomuar. Zyrat e Punësimit do të ndërhyjnë për të nxitur dhe mbështetur krijimin e vendeve të reja të punës duke bashkëpunuar me punëdhënësit dhe nëpërmjet subvencionimit të tyre.
Në janar të këtij viti, qeveria shqiptare miratoi Programin e Fondeve të Nxitjes së Punësimit, të cilat në krahasim me vitin 2013, pra me vetëm dy vite më parë, janë pesëfishuar. Nga 90 milion që ishin në vitin 2013, sot ato janë plot 490 milion për këtë vit. Përmes këtij programi synohet që të shtatëfishohet numri i të punësuarve nga këto programe krahasuar vetëm me dy vite më parë. Grupet të cilat do të nxiten më me përparësi janë të rinjtë, gratë, romët, personat me aftësi të kufizuara, jetimet dhe grupe të tjera shoqërore, të cilët e kanë të vështirë të përfshihen në tregun e punës.
Përmes 7 programe të reja që do të zbatohen gjatë vitit 2016, do mundësohet punësimi i mbi 10.000 punëkërkuesve të papunë, ku rreth 70% e tyre do të jenë gra e vajza dhe 55% e gjithë programit do të jenë punëkërkues të rinj.
