Një vit pas armëpushimit mes Hamasit dhe Izraelit, i cili duhej të mundësonte hyrjen e sasive të mëdha të ushqimeve në Gazën e shkatërruar nga lufta, mungesa e ushqimit vazhdon të jetë e përhapur.
Masri, një 35-vjeçare dhe nënë e tetë fëmijëve, nuk ka shumë zgjidhje.
Pa kuzhinën që ofron ushqime falas përmes organizatave humanitare, ajo dhe fëmijët e saj nuk do të kishin “absolutisht asgjë”, i tha ajo agjencisë AFP.
Çdo ditë, ajo niset herët në mëngjes dhe kthehet pasdite me katër enë me oriz, thjerrëza dhe pak mish pule. Familja prej dhjetë personash, që jeton në një tendë në Khan Junis, e konsumon këtë si vaktin e vetëm të ditës.
Ata nuk hanë mëngjes dhe nuk kanë as darkë.
Bashkëshorti i saj është plagosur në të dyja këmbët nga një sulm ajror dhe nuk mund të shkojë të kërkojë ushqim si të tjerët. Edhe mielli i pakët që kanë, duhet të ndahet me kujdes që të zgjasë sa më shumë.
Në gusht të vitit 2025, një organizatë e mbështetur nga Kombet e Bashkuara, IPC, shpalli gjendjen e urisë në Gaza, por Izraeli e kundërshtoi menjëherë këtë vlerësim. Në dhjetor, OKB-ja e hoqi këtë shpallje, duke deklaruar se armëpushimi kishte lejuar hyrjen e furnizimeve të mjaftueshme gjatë dy muajve për të përmirësuar situatën.
Organizata izraelite COGAT, përgjegjëse për çështjet civile në territoret palestineze, i tha AFP-së se situata humanitare në Gaza ishte e qëndrueshme.
Megjithatë, Shaun Hughes, përfaqësues i Programit Botëror të Ushqimit të OKB-së, tha se situata e sigurisë ushqimore mbetet jashtëzakonisht e rëndë.
Sipas të dhënave më të fundit, të publikuara në korrik, rreth 1.4 milionë nga 2.1 milionë banorët e Gazës përballeshin me mungesë të theksuar të ushqimit. Prej tyre, 200 mijë persona ndodheshin vetëm një hap larg gjendjes së urisë.
Mungesa e ushqimit të shëndetshëm rrezikon fëmijët
Edhe pse disa ushqime lejohen të hyjnë në Gaza, mungesa e një diete të larmishme vazhdon të përbëjë rrezik për shëndetin.
“Ushqimi i larmishëm është një nga problemet kryesore të sigurisë ushqimore në Gaza”, tha Hughes, duke theksuar se mielli, buka dhe ushqimet e thata nuk mjaftojnë për të plotësuar nevojat e organizmit.
Sipas tij, fëmijët, gratë shtatzëna dhe nënat që ushqejnë foshnjat me gji kanë nevojë për proteina, perime, fruta dhe lëndë të tjera ushqyese thelbësore.
Masri tregon se fëmijët e saj, të moshës nga 3 deri në 14 vjeç, “ëndërrojnë të hanë fruta”, por familja nuk ka mundësi t’i blejë ato. Njëri prej djemve të saj vuajti nga kequshqyerja gjatë krizës së urisë në vitin 2025.
Gjendja e tij po përmirësohet gradualisht, por pasojat e kequshqyerjes mund të jenë afatgjata.
Mungesa e lëndëve ushqyese dobëson sistemin imunitar të fëmijëve, i bën ata më të prekshëm ndaj sëmundjeve dhe pengon zhvillimin e tyre fizik. Sipas Hughes, episodet e përsëritura të kequshqyerjes së rëndë mund të lënë pasoja që vazhdojnë edhe në moshë madhore, si në zhvillimin fizik, ashtu edhe në atë mendor.
Edhe në spitalin Nasser në Khan Junis, drejtuesja e njësisë së kequshqyerjes, Israa al-Najjar, tha se kishte vënë re një rritje të problemeve shëndetësore që lidhen me kequshqyerjen dhe ndikojnë në sistemin imunitar.
Një raport i publikuar të enjten nga organizata Médecins du Monde zbuloi se 93% e grave shtatzëna ose që ushqejnë fëmijët me gji shfaqnin simptoma të anemisë, një gjendje që lidhet ngushtë me kequshqyerjen. Vetëm 17% e tyre konsumonin një dietë mjaftueshëm të larmishme për të përmbushur nevojat ushqyese.
Ndërkohë, Masri vazhdon të shkojë çdo ditë në kuzhinën humanitare për të siguruar ushqim për familjen, edhe pse vuan nga astma dhe lodhet shumë.
Fëmijët e saj kalojnë ditët duke mbledhur copa najloni, kartoni dhe sfungjeri për të përforcuar tendën ku jetojnë, e cila është në gjendje të keqe.
Masri e cilëson këtë situatë si të turpshme, duke thënë se fëmijët nuk duhet të detyrohen të jetojnë dhe të mbijetojnë në kushte të tilla.
“Betohem në Zot, kjo nuk është normale”, u shpreh ajo.
