Ditën e sotme Sekretari i Përgjithshëm i Partisë Socialiste, Taulant Balla, ka denoncuar atë që sipas tij ishte një vendim tërësisht në shkelje të Kodit Zgjedhor, për t’i mundësuar PD-së ndryshimin e raportit finaciar të fushatës, ku PD nuk ka justifikuar afro 1 milionë dollarë shpenzime për lobim në SHBA, në rrugë të dyshimta bankare.
Balla shkruante se vendimi i Zgurit ku thuhej se “KQZ iu jep edhe 10 ditë të tjera afat për të sjellë çdo dokument që ato vlerësojnë se mungon në lidhje me të ardhura apo shpenzime gjatë periudhës zgjedhore”, po i jepte kohë PD-së që të ndryshonte dhe manipulonte raportin financiar.
Mirëpo, pas kësaj deklarate publike të Ballës ku kreu i KQZ ishte hapur në shkelje të ligjit, ky i fundit është tërhequr duke marrë një tjetër vendim.
Burime të besuara për lexo.al bëjnë me dije se në vendimin e ri Zguri nuk e lejon PD-në të ndryshojë raportin financiar të zgjedhjeve, por ju lejon vetëm disa partive të plotësojnë dokumentacionin që mungon./Lexo.al
