Ndërsa qeveria shqiptare ka hartuar planin për të parandaluar kultivimin e kanabisit, sasi të konsiderueshme lënde narkotike vijojnë të sekuestrohen nga Policia.
Në aksin rrugor Triport-Zvërnec, uniformat blu të qytetit të Vlorë, pas informacioneve të marra, ndaluan dy makina të cilat transportonin kanabis në peshën 1323 kg. Por sapo kanë ndjerë praninë e policisë, personat kanë braktisur automjetet dhe duke përfituar nga errësira janë larguar duke ju fshehur efektivëve. Një prej makinave fuoristradë me targë AA 991 RA tërhiqte edhe një mjet lundrues me të cilin trafikantët do të bënin të mundur transportimin e kanabisit drejt shtetit fqinj Italisë, përmes detit. Gomonia ishte me tre motorë “Mërkuri” 350 KF secili.
Ndërkohë, droga ishte e fshehur në makinën e dytë, tip Furgon me targë AA 822 DE. Kanabisi ishte ndarë në 52 paketime me mbështjellje plastike dhe 10 çanta sportive.
Policia e Vlorës thotë se vijojnë hetimet dhe po punohet për identifikimin dhe kapjen e autorëve me qëllim vendosjen e tyre para përgjegjësisë penale. /b.d
