Policia e Shtetit ka vepruar me maturi të plotë dhe ka qenë lartësinë e detyrës, në zbatim të ligjeve për tubimet dhe planit të saj operacional për menaxhimin e protestave të opozitës. E ftuar në një studio televizive, zv.ministrja e Brendshme, Rovena Voda theksoi se në protestat e opozitës, sidomos në atë të së shtunës ka pasur sulme të padrejta ndaj Policisë së Shtetit, ka pasur 18 efektivë të lënduar dhe këtë e vërteton edhe raporti i Avokatit të Popullit.
Voda solli në vëmendje se goditja e forcave të Policisë në detyrë dhe goditja e institucioneve përbëjnë vepra penale.
“Policia e Shtetit vepron në rastin e tubimeve dhe protestave sipas ligjit specifik për këto raste, dhe të dyja palët kanë të drejta dhe detyrime. Organizatorët nuk mundën të menaxhonin turmën, aktet e dhunshme ndaj Policisë së Shtetit. Pamë pamje të trishtuara të kryetarit të opozitës që fliste dhe në anën tjetër hidheshin bomba Molotov që na kujtuan Shqipërinë e vitit ’97”, theksoi Voda.
Voda theksoi se ministri Lleshaj dha mesazhin që veprimtaria e policisë ka qenë në perfeksion, ndërsa veprimi ndaj Dollapit u duk sikur u teprua. Policia bëri thirrje të identifikohen dhe të mos mbajnë maska protestuesit. Ka pasur reagim arrogant dhe ndoshta dhunë verbale, që më pas ka çuar në atë reagim të Policisë. Shtatë orë, nën dhunë psikologjike, fizike, të një turme agresive që përdori dhunë ndaj Policisë së Shtetit. Ai reagim nuk e cenon në tërësi performancën e Policisë”, theksoi Voda.
Ajo u bëri thirrje protestuesve të respektojnë ligjin për tubimet, të mos përdorin akte dhune ndaj policisë dhe institucioneve shtetërore, pasi siç tha, skenat e dhunës nuk i përkasin Shqipërisë së vitit 2019. Voda e cilësoi goditjen e institucioneve si atentat ndaj institucioneve kushtetuese të Shqipërisë dhe theksoi se pritet edhe reagimi i Prokurorisë.
“Turmë e çoroditur, dhe organizatorët janë të çoroditur, ndërsa thirrjet për hetime do shihen si do përfundojnë. Në krah të Policisë së Shtetit kanë qenë të gjithë partnerët ndërkombëtarë, Ambasada amerikane dhe OSBE”, tha ajo.
“Po troket finalizimi i Reformës në Drejtësi. Në fund të qershorit krijohet SPAK dhe BKH ku ka dosje të nxehta dhe ne presim të dalin përgjegjësit para Drejtësisë. Opozita nuk duhej të bëhej pengesë e finalizimit të Reformës në Drejtësi. Dalja e opozitës nga parlamenti e vonoi këtë proces”, theksoi Voda.
/a.rada
