Mark Zuckerberg do të transferojë 99 përqind të aksioneve të tij në Facebook Inc, aktualisht me vlerë 45 miliardë dollarë, te një projekt i ri filantropie për potencialin dhe barazinë njerëzore. Themeluesi i Facebook dhe gruaja e tij e kanë shkruar këtë të martën, në një letër adresuar vajzës së tyre të sapolindur.
Plani, i cili u postua në faqen e Zuckerbergut, tërhoqi mbi 570 mijë “likes”, përfshirë edhe këngëtarja Shakira, Arnold Schwarzenegger dhe Melinda Gates, gruaja e themeluesit të Microsoft, Bill Gates. Ky i fundit, ashtu si shumë miliarderë të tjerë, kanë themeluar fonadacione të ngjashëm, duke ua dedikuar pasuritë e tyre të mëdha qëllimeve të bamirësisë.
Zuckerberg, 31 vjeç, i cili do ta kontrollojë iniciativën e re së bashku me gruan, Priscilla Chan, ndërsa do të mbetet në drejtim të rrjetit më të madh social, tha se do të shiste apo jepte deri në 1 miliardë dollarë aksione në secilin prej tre viteve të ardhshëm.
Ai do të mbajë paketën kontrolluese në Facebook, vlerësuar 303 miliardë dollarë të martën në mbyllje të bursave, deri në atë që kompania e quajti “një të ardhme të parashikueshme”. Sipas të deklaratave të fundit nga Facebook, Zuckerberg zotëron katër milionë aksione të klasit A dhe 422.3 milionë aksione të klasit B, të cilat kanë fuqi votuese dhjetë herë më të madhe se ato të klasit A.
Gjithsej, ai mban 54 përqind të fuqisë votuese të aksioneve të kompanisë.
Zuckerberg tha se synon të mbetet shef ekzekutiv i Facebook “edhe për shumë, shumë vjet”.
Projekti i ri, “Chan Zuckerberg Initiative”, nuk është i pari i tij në botën e filantropisë. Kur ishte 26 vjeç, ai firmosi Giving Pledge (Premtim për të dhënë), i cili ftonte industrialistët dhe familjet më të pasura të botës të jepnin më tepër se gjysmën e pasurisë për çështje bamirësie, gjatë jetës ose në testament.
“Një kombinim trush, pasioni dhe burimesh në këtë shkallë do të ndryshojë jetën e milionave. Në emër të brezave të ardhshëm, unë i falënderoj”, shkruan në Facebook Warren Buffet, miliarderi 85-vjeçar, i famshëm për bamirësitë e tij.
Melinda Gates shkruan: “Fjala e parë që të vjen në mendje është: Wow! Shembulli që po jepni sot është frymëzim për ne dhe gjithë botën”.
Reuters/JavaNews
