Ministria e Ekonomisë rishpalli garën për dhënien me koncesion të zonës teknologjike të Spitalles . Sipas njoftimit të publikuar në faqen zyrtare të Ministrisë së Ekonomisë, dorëzimi i ofertave do të behët 28 prill.
Objekti i kontratës do të jetë ndërtimi, zhvillimi, mirëmbajtja dhe operimi i zonës së teknologjisë dhe zhvillimit ekonomik, në Spitallë, Durrës për një periudhë 99 vjeçare.
Zona e teknologjisë dhe zhvillimit ekonomik shtrihet në afërsi me Portin e Durrësit, më të madhin dhe më të rëndësishmin në Shqipëri, pranë qytetit të dytë për nga zhvillimi ekonomik në Shqipëri, Durrësit, vetëm 30 km larg aeroportit ndërkombëtar “Nënë Tereza”, 37 km nga kryeqyteti i Shqipërisë, Tirana.
Vlera e kërkuar e sigurimit të ofertës është 15,000,000 lekë (pesëmbëdhjetë milionë). Në kriteret e përzgjedhjes së fituesit, propozimi teknik për ndërtimin e zonës vlerësohet me 25 pikë, ndikimi mjedisor 10 pikë, ndikimi social 15 pikë, koha e përfundimit të investimit 10 pikë dhe kapaciteti financiar dhe mundësia e financimit të projektit (plani i biznesit) me 40 pikë. Kjo është hera e tretë që MZHETTS-s shpall garën për këtë zonë.
http://www.ekonomia.gov.al/files/userfiles/njoftimi_i_kontrates_ZTZHE_2017.pdf
/a.m.
