Analisti Preç Zogaj ka bërë një rezyme të hollësishme të zgjedhjeve të 11 majit, ku PS doli forcë fituese me 83 mandate, ndërsa PD mori vetëm 50 mandate duke pasur një diferencë të madhe votash me partinë në pushtet.
Në emisionin “Trialog” në RTSH, Zogaj theksoi se zgjedhjet nuk patën surpriza të mëdha dhe se rezultati ishte i parashikuar qartazi dhe se për këtë, sipas tij, ndikoi kriza e opozitës, që ka pasuar pas vitit 2021.
“11 maji nuk kishte surpriza ishte parashikuar qartazi fitorja e PS me shumë diferencë dhe ishte parashikuar qartë rënia e PD në lokacion me Partinë e Lirisë, ishte parashikuar qartazi suksesi relativ i disa partive të vogla, që jo se nuk bënë surpriza, por si rezultat i sistemit zgjedhor nuk u futën në parlament. E reja e këtyre zgjedhjeve që ka ndikim të drejtpërdrejtë te rezultati i zgjedhjeve është kriza e opozitës. Nëse opozita nuk do kishte hyrë në krizë pas vitit 2021, në bindjen time opozita do shkonte drejt fitores”, tha Zogaj.
Ai beson se nëse opozita do të kishte qëndruar e bashkuar dhe pa krizë pas 2021-shit, ajo mund të kishte pasur mundësinë për të fituar zgjedhjet.
“Këto ishin zgjedhje që kishin dhe parregullsi, kishte të ëmbla por edhe të tharta më shumë sa i takon raporti të OSBE/ODIHR-it. Por fakti është se raporti i OSBE mbetet një raport i ngjashëm më shumicën e raporteve që ka bërë për zgjedhjet në Shqipëri, por nuk është se bëhen qëndrime dhe kancelaritë nuk kanë mbajtur qëndrime kundër këtyre zgjedhjeve. Në 2021 nuk mund të flasim për një krizë por për prishje të opozitës nga Sali Berisha për problemet e tij, ishte faktori numër një që çoi në këtë diferencë kaq të madh mes PD dhe partisë fituese”, tha Zogaj.
