Kryeministri Edi Rama ka paralajmëuar mëngjesin e kësaj të mërkure, se të gjithë zjarrvënësit që po ndezin zjarret qëllimin do të ndëshkohen rëndë.
“Ata që ndezin zjarre qëllimisht, shkatërrojnë pasurinë dhe rrezikojnë jetë, në këtë kohë të vështirë ngrohjeje globale dhe flakësh që po sfidojnë të gjitha shtetet e Mesdheut sidomos, duhet të marrin dënimin më të rëndë që parashikon ligji.”, shkruan Rama në një postim në rrjetet sociale.
Pas një nate të gjatë beteje të zjarrfikësve me flakët në të gjithë vendin, kryeministri i ka falenderuar ata me këto fjalë: “Falenderim, respekt, mirënjohje me zemër për zjarrfikësit, forcat e ushtrisë, policinë, vullnetarët dhe banorët që po përballen me flakët, duke rrezikuar jetën për të mbrojtur njerëzit, shtëpitë dhe natyrën tonë.”
Operacionet për përballimin e zjarreve që kanë përfshirë disa zona të Shqipërisë kanë vijuar me intensitet të lartë edhe gjatë natës, duke u përqendruar kryesisht në afërsi të zonave të banuara dhe parqeve kombëtare.
Aktualisht po punojnë në terren tre helikopterë në Gramsh dhe dy në Delvinë, dy prej zonave ku situata paraqitet më pritike për momentin. Mbrëmjen e kaluar në orët e vona deri gati në të gdhirë, ministri i Mbrojtjes Pirro Vengu ka zhvilluar një mbledhje në Delvinë me strukturat e Emergjencave dhe Ushtrisë si dhe strukturat drejtuese vendore.
Kjo mbledhje u bë për miratimin e planit të masave për zjarret, pasi situata u përkeqësua mbrëmë në Bashkinë Delvinë, ku zjarri mbërriti pranë qytetit duke rrezikuar banorët.
