Situata nga zjarri në malin “Shën Gjergji” në Dukat të Vlorës mëngjesin e kësaj të premteje po shkon drejt normalizimit.
Sipas informacioneve nga terreni bëhet me dije se vatra e zjarrit në majën e malit të Dukatit që rrezikonte parkun kombëtar të Llogorasë, është minimizuar ndjeshëm ndërsa në varësi të kushteve atmosferike kjo vatër pritet të shuhet totalisht këtë të premte.
Ndërkohë në shpatin e malit të Dukatit vijon një tjetër vatër aktive zjarri, e cila sipas zjarrfikëses së Vlorës është e menaxhueshme.
Sipas informacioneve, për shkak se situata po shkon drejt përmirësimit, aty është ndalur operacioni nga ajri ku janë larguar dy helikopterët Couger, që kanë vepruar prej 6 ditësh në Dukat.
Gjithashtu janë larguar edhe forcat e armatosura për të vepruar në një tjetër vatër zjarri në rang qarku, atë në Delvinë.
Në shpatin e malit Dukat për të shuar vatrën e zjarrit po operojnë zjarrfikësit e Vlorës dhe shtabi emergjencave civile.
Ndërkohë ka nisur edhe monitorimi, pasi në varësi të erës mund të ketë rrezik për riaktivizim të zjarrit. Theksojmë këtu që kjo është dita e 7-ë që vazhdon zjarri në Dukat pas riaktivizimit.
Dukati u dogj edhe pak ditë më parë prej 10 ditësh, por flakët u shuan për të nisur sërish për një tjetër javë kritike në luftë me flakët.
