Situata e zjarreve në qarkun e Shkodrës mbetet shqetësuese, veçanërisht në zonën e Fushë Arrëzit. Vatra kryesore e zjarrit, e nisur në fshatin Xath, është përhapur gjatë natës, duke përfshirë edhe fshatin Flet dhe zonën “Kunorë Dardhë”. Zjarri ka djegur sipërfaqe malore me pisha dhe bimësi të dendur, ku ndërhyrja nga toka është shumë e vështirë.
Në lidhje me këtë situatë, dy banesa janë evakuuar një ditë më parë, por aktualisht nuk ka rrezik për banorët. Në operacionin për shuarjen e zjarrit janë angazhuar dhjetëra efektivë zjarrfikës, punonjës të shërbimeve emergjente, shërbimi pyjor, policia dhe 66 ushtarë të Forcave të Armatosura, të mbështetur me automjete zjarrfikëse dhe mjete të tjera logjistike.
Ndërkohë, në Bashkinë Shkodër janë regjistruar 11 raste zjarri, ku ndërhyrja e shpejtë ka parandaluar përhapjen e flakëve. Forcat zjarrfikëse kanë ofruar ndihmë edhe në Bashkitë Vau Dejë dhe Malësi e Madhe.
Në zonën pyjore Baks–Rrjoll, në Kneten e Domnit, një vatër zjarri në kallamisht është izoluar falë sipërfaqes ujore përreth. Në Malësinë e Madhe janë shënuar dy raste zjarri, në Gruemirë dhe Malin e Hotit, por aktualisht nuk ka vatra aktive.
Në Vau Dejë janë evidentuar katër raste zjarri, me Hajmelin si zonën më problematike, por pa dëme në njerëz apo banesa.
Puka raporton dy raste zjarri, ku më shqetësuese mbetet situata në fshatin Mesul. Era e fortë po vështirëson përpjekjet për kontrollin e flakëve, ndaj në vendngjarje janë dërguar forcat zjarrfikëse me pajisjet përkatëse.
Autoritetet bëjnë apel për kujdes maksimal dhe bashkëpunim nga banorët për të parandaluar përhapjen e zjarreve.
