Dy zjarret më të mëdha që kanë përfshirë ndonjëherë Los Anxhelosin në Shtetet e Bashkuara këtë javë, i kanë shkaktuar 10 vdekje dhe i kanë shkatërruar të paktën 10.000 shtëpi, ndërtesa dhe struktura të tjera, thanë zyrtarët të premten.
Zyrtarët në Los Anxhelos njoftuan se zjarri “Eaton”, i cili u ndez të martën mbrëma, i ka rrënuar më shumë se 5.000 struktura. Ky term përfshin shtëpi, ndërtesa banimi, biznese dhe automjete.
Një zjarr tjetër në perëndim të Los Anxhelosit, më i madhi që e ka përfshirë këtë zonë ndonjëherë, i ka shkatërruar mbi 5.300 struktura.
Numri i të vdekurve nga zjarret u rrit në 10 nga shtatë, njoftuan zyrtarët shëndetësorë në Los Anxhelos në një përditësim natën e së enjtes.
Sherifi i Qarkut të Los Anxhelosit, Robert Luna, tha në një konferencë për shtyp se numri i të vdekurve pritet të rritet.
“Duket sikur një bombë atomike ka rënë në këto zona. Nuk presim lajme të mira dhe nuk po i presim me padurim ato shifra”, tha Luna.
Të gjitha zjarret që shpërthyen këtë javë në Los Anxhelos kanë përfshirë një hapësirë prej 40-kilometrash në veri të qendrës së qytetit, duke nxitur një ndjesi frike dhe trishtimi në gjithë qytetin e dytë më të madh të vendit.
Qeveria amerikane nuk ka lëshuar ende shifra për koston e dëmeve të shkaktuara apo për numrin e strukturave të shkatërruara.
AccuteWeather, një kompani private që ofron të dhëna për motin dhe ndikimin e tij, tha të enjten se dëmet dhe humbjet ekonomike kanë shkuar në 135-150 miliardë dollarë.
Zjarrfikësit bënë përparime të mëdha të enjten për ta ngadalësuar përhapjen e zjarreve të mëdha, por frenimi i tyre është ende i vështirë.
Zyrtarët ende nuk e dinë se çfarë i ka shkaktuar zjarret, por thonë se janë duke hetuar vazhdimisht.
Evakuime, mbyllje shkollash dhe arrestime
Të paktën 180.000 njerëz janë urdhëruar të evakuohen, ndërsa zjarret përfshirë rreth 117 kilometra katrorë territor. Zjarri në Palisades tashmë është më shkatërruesi në historinë e Los Anxhelosit.
Të gjitha shkollat në Distriktin Shkollor të Bashkuar të Los Anxhelosit, i dyti më i madhi në vend, do të qëndrojnë të mbyllura të premten për shkak të tymit të madh që ka mbuluar qytetin dhe hirit që po bie në disa zona.
Mësimi nuk do të rifillojë derisa të përmirësohen kushtet, sipas zyrtarëve.
Të paktën 20 njerëz janë arrestuar për plaçkitje dhe qyteti i Santa Monikës ka shpallur orë policore për shkak të mosrespektimit të ligjit, njoftuan zyrtarët.
Trupat e Gardës Kombëtare arritën në Los Anxhelos të enjten në mbrëmje. Sherifi i qarkut tha se për t’i mbrojtur pronat, ato do të vendosen pranë zonave të shkatërruara nga zjarri dhe pritet që ora policore të hyjë në fuqi nga ora 18:00 deri në orën 6:00./REL
