Libri “Zjarr dhe tërbim – Brenda Shtëpisë së Bardhë të Trumpit” i gazetarit Michael Wolff vazhdon të ngjallë polemika, e pretendimet e tij duket kanë mbërritur deri te Nikky Haley.
Ish-guvernatorja e Karolinës së Jugut, që sot përfaqëson Shtetet e Bashkuara në OKB, mohon me forcë pretendimet e Wolffit se ajo kalon shumë kohë me Donald Trumpin në avionin presidencial.
“Thashetheme të ndyra e të pabazuara”, i quan 46-vjeçarja fjalët që kanë qarkulluar lidhur me një marrëdhënie më të ngushtë të saj me shefin e Shtëpisë së Bardhë.
Në librin polemizues, gazetari 64-vjeçar nënvizonte se Trumpi e shpenzonte një pjesë të mirë të kohës së lirë me Haleyn në bordin e “Air Force One”.
Javën që shkoi, ndërsa fliste në televizion me komedianin Bill Maher, ai këmbënguli se marrëdhënia e Trumpit me një grua të rëndësishme të administratës së tij “është 100 për qind e vërtetë”.
Haley e shfajëson veten shumë thjesht. “Në avionin presidencial, – thotë ajo, – jam ngjitur vetëm një herë dhe në praninë e një numri të madh njerëzish. Presidentin kokë më kokë nuk e kam takuar kurrë. Por del gjithmonë dikush, që i hedh shigjeta një gruaje të pavarur”, shton ambasadorja. “Unë jam mësuar tani dhe vazhdoj rrugën time”./a.m.
