Kualifikimi në Ligën e Kampionëve për trajnerin e Real Madridit, Zinedine Zidane do të thotë përballje me ish-skuadrën e tij, Juventusin, të cilën thotë se e ka në zemër.
Francezi është shprehur se Real Madridi nuk është favorit ndaj Juventusit, pasi sipas tij është shumë e vështirë të shënosh gol kundër një mbrojtje aq të fortë, transmeton Koha.net.
“Los Blancos” e siguruan kualifikimin në finale duke eliminuar në gjysmëfinale rivalin lokal Atletico Madridin me rezultat të përgjithshëm 4-2.
“Kam një ekip që përbëhet nga lojtarë të fortë, dhe gjithçka që kemi bërë është falë tyre. Jami shumë të lumtur që jemi përsëri në finale”, ka thënë ai për Mediaset Premium.
“U rrita dhe u bëra lojtar më i mirë te Juve. Është një klub i madh. Të përballem me të në finale është speciale, sepse ende e kam në zemrën time Juventusin. Do të jetë një final e bukur, kemi pasur rrugëtim të ngjashëm dhe të dy ekipet e kanë merituar të jenë aty. Reali nuk është aspak favorit, pasi është shumë e vështirë t’i shënosh këtij Juventusi. Mbrojtja megjithatë nuk është e vetmja forcë e saj, pasi ka lojtarë të shkëlqyer edhe në sulm gjithashtu”, është shprehur Zidane.
Finalja ndërmjet Juventusit dhe Real Madridit në finale të Ligës së Kampionëve do të zhvillohet më 3 qershor në Cardiff, përgatiti Koha. (b.an)
