Prokurori Ramadan Troci, i cili fitoi simpatinë e shqiptarëve pasi firmosi arrestimin e ish-guvernatorit Fullani, është shkarkuar nga KPK, duke mos kaluar vettingun.
Ramadan Troci, prokuror në Prokurorinë e Përgjithshme, ngeci në rrjetën e vettingut pasi nuk justifikonte pasurinë
Prokurori ka rezultuar i pastër në vlerësimin për figurën, por ka ngecur në rrjetë për pasurinë. Nga analiza financiare është konstatuar se Troci ka një mungesë financiare përgjatë viteve 2004, 2005, 2006, 2007, 2012 dhe 2013.
Prokurori Troci ka bërë një deklarim të pasaktë të pasurisë dhe e ka fshehur një banesë që ka në Paskuqan. Sa i përket aspektit profesional, për Trocin ka patur 10 denoncime dhe janë hetuar 8 dosje nga viti 2006 deri në vitin 2011, që kishin si pasojë plagosjen apo vdekjen në minierat e Bulqizës.
Prokurori Troci ishte kandidat për Këshillin e Lartë të Prokurorisë.
I njohur si prokurori që hetoi dhe arrestoi ish-guvernatorin Ardian Fullani dhe Shpëtim Gjikën, si dhe hapi skandalin e tokave në Vlorë, Trocit iu kërkua llogari edhe për dosjet hetimore në Bulqizë. Por, prokurori tregoi se çdo vendim pushimi që kishte marrë, e ka vendosur në bazë të provave.
“Unë jam prokurori që i kalova shtetit toka të tjetërsuara në bregdet me vlerë 870 milionë euro”, kujtoi Troci.
Javanews/a.ç
