Një nga punimet e Banksy-t është larguar nga një parking në Liverpool, e kësisoj mund të zhvendoset në një galeri të re të artit të rrugës.
Vepra e quajtur “Aeroplani i dashurisë” është punuar në vitin 2011 dhe duket si një aeroplan i vjetër me dy palë krahë.
Një zemër qëndronte prapa tij. Aeroplani tashmë është larguar nga muri i parkingut në rrugën “Rumford”, por zemra ka mbetur.
Sikurse edhe veprat tjera të Banksyt do të zhvendoset në Liverpool në një galeri të specializuar për art rruge.
“Sincura Group” e njohur për zhvendosjen, ekspozimin dhe shitjen e veprave të artistit ka pranuar se e ka hequr aeroplanin, transmeton “Koha Ditore” shkrimin e CNN.
“Objekti të cilin e ka dekoruar Banksy është në renovim dhe aeroplani është zhvendosur para se të shkojë për ekspozim në shtëpinë e re”, kanë thënë nga kjo kompani. Sam Fishwick, grafist nga Liverpooli, hedh poshtë idenë për një galeri të artit të rrugës.
“Nuk është më art rruge nëse vepra zhvendoset në muze “, ka thënë ai për BBC-në. “Është vepër e guximshme, është në rrugë. Nuk ka kuptim të zhvendoset në galeri.
Kur njeriu shkon dhe e sheh atë në galeri, vepra e humb sharmin. E humb edhe karakterin”, ka thënë ai…(b.an)
