Rreth 4.5 milionë euro, që kompania Cez ka kaluar në llogaritë bankare të Kastriot Ismailajt, njëherazi pronar i kompanisë Debt International Advisory janë zhdukur. Siç raporton ABC News, Prokuroria e Tiranës, bazuar në shkresat e bankave të nivelit të dytë në vend, ka mësuar se shuma prej 4.5 milionë euro që kompania DIA ka përfituar nga CEZ-Shpërndarje brenda një afati 1 vjeçar, janë zhdukur.
Burimet thonë se një pjesë nga kjo shumë e madhe parash, është tërhequr cash nga i dyshuari Ismailaj në Shqipëri dhe pjesa tjetër është transferuar në llogaritë bankare të kompanisë në vende të njohura si parajsa fiskale. Hetuesit thonë se nuk dihet konkretisht se kush janë përfituesit e këtyre shumave që janë transferuar jashtë Shqipërisë. Ndërsa për paratë e tërhequra cash nga Ismailaj, ky i fundit i ka justifikuar si investime të kryera dhe pagesa për studime fizibiliteti në projekte minierash, për shërbime ligjore, për shpenzime zyre, konsulenca, shpenzime udhëtimesh, pagesa dhe numra telefoni. Për hetuesit ky arsyetim I Kastriot Ismailajt nuk justifikon shumën e përfituar nga kompania çeke Cez-Shpërndarje.
Po ashtu mësohet se paratë e sekuestruara në Shqipëri që kapin shifrën e 5 milionë eurove, dhe që janë gjetur në llogaritë bankare të të dyshuarit e kompanisë së tij “DIA” janë paratë e një shtetase amerikane, të cilën ka arritur ta mashtrojë.
Sipas vendimit të gjykatës, kompanitë në emër të Ismailajt dyshohet se janë përdorur si koperturë për të xhiruar parat e përfituara nga jashtë për t’i ritransferuar në vende, banka dhe destinacione të ndryshme po jashtë Shqipërisë.
Kastriot Ismailaj ndodhet në burg i dyshuar për akuzën e “mashtrimit me pasoja të rënda” dhe “pastrimit të parave” në bashkpunim.
