Nga Lutfi Dervishi
Kryeministri Rama ka rënë dakord me opozitën për t’i dhënë zgjidhje krizës politike, duke marrë si premtim mbështetjen e saj për hapjen e negociatave në qershor në këmbim të zgjedhjeve të parakohshme parlamentare pranverën e vitit tjetër.
Me ndërmjetësinë e ndërkombëtarëve, palët janë marrë vesh që të nisin një dialog kombëtar, në përfundim të të cilit opozita (cilado qoftë ajo) të jetë pjesë thelbësore e sistemit.
Angazhimi është që për një periudhë 10-vjeçare, PD, PS dhe LSI angazhohen që mos të ketë bojkot as të plotë dhe as të pjesshëm të Parlamentit.
Palët kanë rënë dakord që me ekspertë të përbashkët kushtetues të rishohin sistemin zgjedhor, zgjedhjen e presidentit nga populli dhe përshpejtimin e ngritjes së institucioneve të reja të drejtësisë.
Zgjedhjet lokale nuk janë pjesë e negociatave, por vetë koha dhe rrethanat po ofrojnë një shans për opozitën.
E entuziazmuar nga suksesi i opozitës në Turqi, opozita këtu po konsideron mundësinë e hyrjes në zgjedhje lokale dhe mendon se do të ketë sukses në qytetet e mëdha, si: Shkodër, Durrës, Elbasan dhe po përgatitet për një befasi në kryeqytet.
Në diplomat perëndimor shumë i afërt me opozitën i ka thënë kryetarit Basha se ka më shumë të ngjarë që mbështetësit e opozitës dhe të pakënaqurit me 6 vjet qeverisje të Edi Ramës të revoltohen në kutitë e votimit! Mos e humbin këtë shans- ka thënë diplomati i një vendi avokat për anëtarësimin e Shqipërisë në BE.
Kërkesa kryesore e opozitës për të mos hyrë në zgjedhje dhe frika e qeverisë për të mos krijuar precedentin e rrëzimit të qeverisë nga rruga duket se do të pajtohen me “formulën greke”. Në Greqi, gjatë fushatës së zgjedhjeve, kryetari i Gjykatës së Lartë merr drejtimin e qeverisë dhe disa ministra të rëndësishëm i kalojnë opozitës. Për të krijuar më shumë besueshmëri, kjo periudhë në Shqipëri do të jetë automatikisht 100 ditë.
Opozita ka pranuar që nuk mund të ketë rikthim pas në Parlament, ndërsa qeveria ka premtuar se nuk do të përdorë shumicën e re në Parlament për të ndërhyrë në ligjet që kërkojnë ⅗ (ditët e fundit u fol për ndryshime në kodin penal për të mbrojtur figurat e shtetit).
Reforma zgjedhore do të finalizohet (një kërkesë kyçe e BE-së dhe një nga kushtet e vendosura nga Këshilli Europian vjet në qershor) me rekomandimet e komisionit të përbashkët bipartizan.
Për t’i dhënë garanci shtesë opozitës për zgjedhjet, shitblerja e votës do të konsiderohet krim i rëndë dhe subjekt i strukturave të reja të drejtësisë – SPAK dhe BKH.
Po punohet për modalitetet e fundit të marrëveshjes dhe garant për këtë janë ambasadorët e vendeve të Perëndimit në Tiranë.
Nuk parashikohen dalje mediatike dhe palët kanë rënë dakord që marrëveshja mos të komentohet si fitore as nga qeveria dhe as nga opozita.
Marrëveshja pritet të nënshkruhet në zyrën e Presidentit. I zgjedhur me vota të majta, Presidenti është i vetmi institucion që ka shprehur mirëkuptim të plotë për kërkesat e opozitës.
Fushata e ardhshme elektorale është rënë dakord që t’i ngjajë fushatës së vitit 2017 për nga shpenzimet minimale dhe mungesës së retorikës së ashpër.
Zgjidhja e krizës politike pritet të përshëndetet menjëherë nga Komisioni Europian, OSBE dhe Ambasada Amerikane, të cilët do të dalin me një deklaratë të përbashkët dhe marrëveshjen do ta cilësojnë si një fitore historike për popullin shqiptar!
Lajmi i mësipërm, që pritet të komentohet gjerësisht, është shkruar sot më datë 1 prill 2019.
