Prokuroria shqiptare ka nisur hetimin për çështjen e “Skënderbeut”. Në fakt, një gjë e tillë pritej që në momentin kur Skënderbeu e humbi betejën ligjore edhe në KAS për pezullimin njëvjeçar nga Kupat e Europës. Prokuroria pati kërkuar dosjen e plotë të UEFA-s nëpërmjet FSHF-së, por kjo e fundit nuk e zotëronte atë.
Fakt është që gjatë ditëve të ardhshme prokuroria do të thërrasë në pyetje futbollistë dhe zyrtarë të Skënderbeut, por lajmi i ri është se nuk do të mjaftohet me kaq. Burime të “Panorama Sport” pranë Prokurorisë së Tiranës bëjnë me dije se përveç pjesëtarëve të Skënderbeut do të thirren edhe futbollistë e zyrtarë të Flamurtarit.
Ndërkaq do të thirren në prokurori gjyqtarë, zyrtarë të FSHF-së, si dhe zyrtarë të klubeve të tjera. Numri i atyre që priten të merren në pyetje gjatë javëve në vazhdim është afro 20 dhe ka pjesëtarë të disa klubeve të Superiores.
HETIMI
Menjëherë pas vendimit të KAS-it, që la në fuqi pezullimin e UEFA-s për Skënderbeun, prokuroria shqiptare konfirmoi se do të niste një hetim kryesisht për ngjarjen. Për këtë arsye kërkoi nëpërmjet FSHF-së edhe dosjen e UEFA-s, si dhe argumentimin e KAS-it rreth kësaj çështjeje. Federata jonë e kishte materialin vetëm në rrugë elektronike dhe, megjithëse ia pati dorëzuar dosjen prokurorisë, zyrtarët e kësaj të fundit e kërkuan dosjen në letër të firmosur dhe të vulosur, sepse kështu mund të përbënte provë.
Gjithsesi, leximi edhe studimi i dosjes nga prokuroria pati nisur që kur ata e morën në rrugë elektronike. Aty mësohet se kanë konstatuar elementë që faktojnë një vepër penale dhe pasi e kanë marrë dosjen edhe në mënyrë shkresore kanë vendosur ta regjistrojnë zyrtarisht çështjen në hetim.
Gjatë ditëve të ardhshme do të merren në pyetje disa futbollistë të Skënderbeut, mes të cilëve portieri Shehi dhe mbrojtësit Bajram Jashanica dhe Marko Radas. Por do të ketë edhe të tjerë veç tyre, të cilët do të paraqitjen përpara organit akuzës për të dhënë versionin e tyre rreth do t’u përgjigjen pyetjeve të ndryshme.
LISTA “E ZEZË”
Nuk është vetëm Skënderbeu nën hetim. Do të merren në pyetje edhe zyrtarë të federatës, gjyqtarë, futbollistë të Flamurtarit, si dhe zyrtarë të klubeve të tjera.
Kjo dëshmon dy gjëra: ose në dosjen e UEFA-s ka pasur të dhëna edhe për klube të tjera, ose pasi ka marrë në dorë dosjen në rrugë elektronike nga FSHF-ja prokuroria ka nisur një hetim më vete dhe ka siguruar prova që mund të prekin edhe klube e persona të tjerë, veç atyre të Skënderbeut. Deri tani burimet konfirmojnë se është një listë me afro 20 persona, thuajse të gjithë nga bota e futbollit, që do të merren në pyetje. /panorama
ma.me
