Kandidati republikan në zgjedhjet presidenciale, Chris Christie është tërhequr nga gara pas rezultatit zhgënjyes në parapraket në New Hampshire një ditë më parë.
Guvernatori i New Jerseyt ishte ai që bëri fushatën më të gjatë në këtë shtet, por sërish përfundoi ne vendin e gjashtë.
Christie i bashkohet Carly Fiorinas e cila gjitashtu braktisi garën për shkak të rezultateve në Iowa dhe New Hampshire.
Ish-prokurori Christie është i njohur për gjuhën e tij të drejtpërdrejt dhe shumë agresive, ndërsa edhe për fushatë kishte zgjedhur sloganin “E themi ashtu siç është”.
Gjithsesi, ai shpejt u eklipsua nga Donald Trump, pavarësisht se u duartrokit për performancen në disa debate. Nga tërheqja e tij pritet që të përfitojnë ish-Guvernatori i Floridas, Jeb Bush, dhe Guvernatori i Ohios, John Kasich.
