Kryeministri Edi Rama i është përgjigjur menjëherë deklaratës së Lulzim Bashës, për zgjedhje me qeveri teknike. Kryetari i Partisë Demokratike e cilësoi qeverinë teknike si një kusht për zgjedhjet e ardhshme, por Rama thotë se Basha mund të vërë kushte vetëm në SHQUP. Rama i përmend Bashës se ka ndjekur të njëjtën praktikë kushtesh edhe në Reformën për Drejtësi dhe nuk ka pasur sukses.
“Lulëzim Basha kërkon qeveri teknike dhe thotë e ka kusht!…
Dikush duhet t’ia mësojë se kushte mund të vendosë vetëm brenda Shqupit dhe ta këshillojë që edhe aty me pak kujdes, sepse jo të gjithë janë gati t’ia pranojnë çdo lloj kushti – siç tregoi procesi i Reformës në Drejtësi”, shkruan Rama në Facebook.
Më tej, kryeministri sqaron se qeveria ka mandat katërvjeçar, pasi është zgjedhur nga populli në zgjedhjet e vitit 2013.
“Qeveria ka një mandat për të qeverisur Shqipërinë dhe kontrata jonë me shqiptarët është katërvjeçare. Në asnjë pikë të kësaj kontrate nuk figuron ndonjë detyrim i qeverisë, për t’i bërë babysitting Lulëzimit. Duhet të rritet vetë dhe të mësojë të udhëheqë pa Babisiter!
Lulëzimi më kujton një frazë të bukur të Arrigo Sacchit: Nuk ka më keq për fëmijën se një baba harbut, që e gënjen mendja se i biri është Francesco Totti i ardhshëm!”, shkruan kryeministri.
d.i.
