Një ditë pas mbledhjes së Kryesisë së LSI-së ku u shpall edhe kandidatura e Shezai Rokaj për postin e kryetarit të kësaj partie, Ilir Meta nuk vonon dhe fillon fushatën brenda partisë për zgjedhjet që do mbahen në datën 6 nëntor. Burime për “BalkanWeb” pohojnë se Meta nesër do të zhvillojë një takim me simpatizantët dhe anëtarët e LSI-së në Qarkun e Korçës, ku paradite do të jete në qytetin e Korçës dhe më pas në Pogradec. Ndërkohë është e paqartë nëse dy kandidatët për postin e kreut të LSI-së do të dalin bashkë në fushatë para anëtarësisë apo veçmas.
Ndërsa dje, fill pasi u shpall kandidatura e tij Rrokaj deklaroi se kishte një platformë të qartë politike. Ai tha se synon të krijojë një parti më të hapur për bazën.
“Do të shkojmë përpara, dhe anëtarësia do të vendosë kush do të drejtojë. Platforma tani është në fazën e parë, dhe ka elementët kryesorë. Në momentet e para, platforma ndalet në postulatet kryesore. Partitë tona kanë nevojë të jenë më pak agresive. Shqiptarët kanë probleme më të mëdha. Ndaj zbutja e toneve dhe e konfliktit politik do të jetë një nga drejtimet e mia. Synoj që partia të zbutet nga militantizmi dhe të bëhet më qytetare. Të hapët ndaj shoqërisë dhe të rinjve, si dhe të dëgjojë zërin e intelektualëve. Tashmë baza shihet vetëm për periudhat zgjedhore, rëndom, por unë jam një model ndryshe. në kam drejtuar edhe në pozicione të tjera, edhe politike, edhe akademike. Bësoj se një frymë e tillë vetëm mirë i bën LSI-së”, u shpreh Rrokaj.
