Pas numërimit të rreth 90% të votave në Kosovë, diplomati Roland Bimo ka analizuar për RTSH 24, procesin e votimit dhe rezultatin e deritanishëm, që e renditin Lëvizjen Vetëvendosje me mbi 40% të votave.
Sipas diplomatit, elita politike e Kosovës i krijoi mundësi elektoratit që të merrte vendim për kë donte të votonte në mënyrë shumë të informuar.
“Ngjarje më e rëndësi në jetën diplomatike të shtetit të Kosovës, kur kanë kaluar 26 vite nga çlirimi dhe 17 vjet nga pavarësia. Rezultatet e arritura si proces elektoral janë për t’u patur lakmi.
Vendet e BE-së kanë ceduar në standardet demokratike dhe Kosova paraqitet në stad mjaft të zhvilluar.
Programet më cilët partitë politike i paraqitën elektoratit, mund të kishte pritshmëri të ndryshme, por ajo që ka rëndësi është që popullit të Kosovës elita politike kosovare i krijoi mundësi elektoratit të merrte një vendim për kë do votonte në mënyrë shumë të informuar.
Situata u zhvillua në mënyrë të qetë. Rezultati tregoi atë që treguan dhe sondazhet paraprake, se si qeverisja e Kurtit apo filozofia e tij e qeverisjes vazhdon të gëzojë mbështetje të gjerë, ndonëse nuk ka shumicën absolutet për të krijuar qeveri, është konfirmim i vijës së tij politike për qeverisjen si në politikat e brendshme, ashtu edhe marrëdhëniet me jashtë”, deklaroi Bimo.
Diplomati analizoi edhe përqindjen e ulët të votimit në Kosovë, duke thënë se shkaqet janë nga më të ndryshmet, duke u ndalur te emigracioni dhe zhgënjimi nga politika.
“Fenomeni i rënies së përqindjes së pjesëmarrjes në votime është fenomen mbarëbotëror, sidomos në Ballkan.
Kjo ka shkaqe nga më të ndryshmet dhe ndikon edhe migracioni i përmasave kritike.
Emigracioni krijon një boshllëk, por njerëzit janë të zhgënjyer nga politika”, shtoi ai.
Bimo u ndal edhe te mundësitë që ka Lëvizja Vetëvendosje për të qeverisur të vetme. Ai deklaroi se perspektiva e Kurtit për të krijuar një qeveri të vetme, është e vështirë.
“Ndonëse konfirmohet pëlqyeshmëria që z/.Kurti ka, është e pamjaftueshme ta lejojë të qeverisë i vetëm. Perspektiva është e vështirë për të krijuar një qeveri të vetme ndonëse ai është besimplotë se do jetë në gjendje të krijojë një qeveri me aleatët e deritanishëm.
Ajo që mendoj se duhet analizuar, sa influencë ka patur në zgjedhje ndërhyrja amerikane apo prononcimi i ambasadorit Grenell 3 ditë para zgjedhjeve ku e trajton me tone të ashpra kryeministrin Kurti.
Deklarata përtej oqeanit në ambientin shqiptar luan një rol të rëndësishëm dhe bëhet të besoj se një përqindje e caktuar e votuesve edhe mund të jenë influencuar”, përfundoi ai.
