Partia Demokratike nisi nga Vlora debatin që i paraprin zgjedhjes së kreut të ri të Forumit Rinor të kësaj force.
Kreu i ri i FRPD-së do të zgjidhet sipas parimit “një anëtar, një votë”. Në takimin me të rinjtë demokratë vlonjatë, merrte pjesë edhe kreu i PD-së, Lulzim Basha, i cili garantoi një proces të drejtë dhe të lirë.
“Vlerësoj shpirtin e garës të cilës i janë përveshur kandidatët. Kjo është një garë e lirë dhe e tillë do të vazhdojë. Do të vendosni me votë. Asgjë nuk është e paracaktuar, asnjë s’ka mbështetje të veçantë dhe të 6 kanë mbështetje të plotë për të garuar dhe fituar. 20 debate do të zhvillohet. Të rinjtë po vijnë dhe do të vijnë jo thjeshtë për të qenë anëtarë, por vijne dhe do vijnë për të marrë stafetën për të marrë në duar fatet e vendit”, tha Basha.
Kreu i opozitës u ndal edhe tek akuzat për drejtuesit e maxhorancës, ndaj të cilëve ripërsëriti qëndrimin e demokratëve se mbajnë përgjegjësi dhe janë fajtorë për moshapjen e negociatave.
“Dyshja Rama-Meta nuk i hapën dot negociatat, pavarësisht si asnjehërë tjetër kishin mbështetjen e plotë të opozitës. Nuk përparon vendi, nuk hapën negociatat me blerje votash dhe shkatërrim zgjedhjesh, ekonomia rrokulliset në korrupsion në tatime e dogana. Qeveri që mbahet mend për kontabandën e cigareve e mallrave të tjera të akcizës, që u kushton shqiptarëve 1 milion dollarë në ditë”, tha Basha.
/ Top Channel
Zgjedhjet në Forumin Rinor, PD nis debatin me të rinjtë vlonjatë
