KQZ nis procedurat për zëvendësimin e komisionerëve të PD dhe PR në Komisionet e Zonave të Administrimit Zgjedhor (KZAZ) për zgjedhjet e 18 qershorit 2017. Vendimi është bërë publik sot nga KQZ, pasi PD dhe PR, ndonëse kishin detyrimin ligjor, vendosën që të mos çojnë komisionerë, në përpjekje për të legjitimuar vendimin e tyre për të mos marrë pjesë në zgjedhje pa u krijuar më parë qeveria teknike. Në bazë të ligjit sot KQZ do të duhej të kishte marrë vendimin për ngritjen e Komisioneve të Zonave të Administrimit Zgjedhor (KZAZ) dhe të kishte caktuar datën për thirrjen e mbledhjes së parë të tyre.
“Shkaku që afati ligjor për ngritjen e Komisioneve të Zonave të Administrimit Zgjedhor nuk u arrit te respektohej nga KQZ, është mos përmbushja e detyrimit ligjor nga Partia Demokratike për paraqitjen e propozimeve për anëtarë të dhe sekretarë të KZAZ-ve, dhe nga Partia Republikane, për paraqitjen e propozimeve për anëtarë të KZAZ-ve”, deklaroi zëdhnësja e KQZ Drilona Hoxhaj.
Sipas saj, detyrimi ligjor i PD dhe PR për të dërguar komisionerët parashikohet nga neni 28, pika 2, i Kodit Zgjedhor, por ky detyrim nuk u përmbush nga këto dy subjekte zgjedhore, madje as në tejkalim të afatit ligjor, megjithëse KQZ e toleroi këtë.
“Komisioni Qendror i Zgjedhjeve, pas përmbylljes së afatit për shprehjen e interesit nga shtetas që kanë interes për t’u emëruar si anëtarë apo sekretarë të KZAZ-ve, falenderon të gjithë qytetarët që iu përgjigjën ftesës publike për të kontribuar në administrimin e procesit zgjedhor dhe kanë paraqitur kërkesë dhe dokumentacionin përkatës pranë KQZ-së apo Zyrave Rajonale Zgjedhore. Ky angazhim qytetar, i cili u kërkua nga KQZ në përmbushje të detyrimeve ligjore që Kodi Zgjedhor urdhëron për çdo proces zgjedhor, merr vlerë të shtuar në situatën në të cilën po kalojmë, pasi siguron vijimësinë e punës dhe realizimin e zgjedhjeve në datë 18 qershor”, theksoi zëdhënsja e KQZ.
Ajo informoi se pas dorëzimit nga Inspektorët Rajonalë të kërkesave të paraqitura nga qytetarët pranë Zyrave Rajonale Zgjedhore, dhe shqyrtimit të të gjithë kandidaturave, Komisioni Qendror i Zgjedhjeve në rastin më të parë, me vendim do të emërojë anëtarët dhe sekretarët sipas rastit, për të plotësuar vakancat për çdo KZAZ, për të siguruar ngritjen dhe funksionimin e tyre në përputhje të plotë me përcaktimet e Kodit Zgjedhor.
“Në respekt të informimit të opinionit publik, procedurat e përzgjedhjes dhe të emërimit kryesisht nga KQZ të shtetasve si anëtarë apo sekretarë të KZAZ-ve do të kryhen në transparencë të plotë, sikundër e gjithë veprimtaria dhe puna e KQZ-së për organizimin dhe administrimin e procesit zgjedhor të datës 18 qershor 2017”, deklaroi Hoxhaj.
Javanews.al / ma.me
