Qytetarët në Shkodër, Durrës, Dibër, Lushnjë, Rrogozhinë dhe Vorë kanë votuar sot për të zgjedhur kryetarët e rinj të bashkive, ku në disa zona u hasën vështirësi për shkak të dëborës.
Raportohet se pranë qendrave të votimit është paraqitur policia për të bërë të mundur edhe ruajtjen e materialeve zgjedhore, ku pas përfundimit të procesit do të shoqërohen në KZAZ perkatese , ku edhe do të bëhet numërimi.
Komisioni Qendror i Zgjedhjeve konfirmoi edhe njëherë pjesëmarrjen e ulët të qytetarëve në këto zgjedhje të pjesshme, ndikuar kjo dhe nga moti i keq.
Sipas KQZ, pjesëmarrja e votuesve në këto zgjedhje, deri në orën 19:00, në të 6 bashkitë, është rreth 30%.
Procesi i sotëm u zhvillua kryesisht i qetë, me disa problematika të vogla. Në të paktën 3 qendra votimi në Shkodër nuk u zhvillua ky proces për shkak të kushteve atmosferike.
Sakaq, në Vorë përgjatë ditës së sotme ka pasur një përplasje për shkak të komisionerëve të Partisë Demokratike.
Kujtojme se 654.538 shtetas shqiptarë kishin të drejtën për të zgjedhur mes kandidatëve të PS-së, PD-së dhe koalicionit “Shtëpia e Lirisë”, por në qendrat e votimit pati një numër të ulët pjesëmarrësish.
/b.h
