Tre ditë para zgjedhjeve vendore, Ambasada amerikane në vendin tonë ka porositur qytetarët e saj të shmangin qendrat e votimit, numërimit dhe zyrat e administratës zgjedhore në të gjithë Shqipërinë.
“Zgjedhjet vendore në Shqipëri do të mbahen më 30 qershor 2019. Votimi është planifikuar nga ora 7:00 deri në orën 19:00. Zgjedhjet do të mbahen në çdo bashki shqiptare. Numërimi do të pasojë në qendrat e numërimit dhe mund të zgjasë deri në disa ditë në disa bashki. Incidentet e lokalizuara të dhunës kohët e fundit kanë vënë në shënjestër zyrtarët e zgjedhjeve dhe materialet e votimit, duke ngritur perspektivën e dhunës shtesë ose shqetësimeve të tjera në ditën e zgjedhjeve, në ditët që i paraprijnë dhe përmes numërimit të votave në qendrat e numërimit”.
Ndaj Ambasada e SHBA-së këshillon qytetarët e saj të qëndrojnë vigjilent rreth vendeve të votimit, qendrave të numërimit dhe zyrave zgjedhore.
Të shmangin çdo zonë ku ka shenja të dhunës si dhe të monitorojnë mediat lokale për të qenë të përditësuar mbi zhvillimet./l.m
