Deputeti i Partisë Demokratike, Enkelejd Alibeaj ka mbledhur sot Kolegjin e Kryetarëve dhe Kryesinë, pas dështimit të negociatave me grupin e Sali Berishës për daljen me një kandidat të përbashkët në zgjedhjet e ardhshme lokale.
Në një prononcim për mediat jashtë godinës së degës së PD në Fier, Alibeaj tha se deri më tani, janë depozituar një numër i madh kandidaturash për bashkitë e vendit.
Deputeti demokrat u shpreh se shumë shpejt do të publikojë edhe kandidaturat për të gjitha bashkitë e vendit.
Alibeaj: Sot mbledhja me Kolegjin e kryetarëve të PD së bashku me kryesinë e PD kishin 2 qëllime, informimi për të gjitha zhvillimet e fundit që ishte dhe synimi ynë për daljen tonë me një kandidat të përbashkët dhe marrja e qëndrimit që morëm ishte e udhës sot që jo vetëm të informonim por edhe fillimi i menjëhershëm i procesit të riorganizimit të të gjitha degëve të PD-së në funksion të rifreskimit dhe ripërtëritjes dhe identifikimit qoftë për kandidatura për kryetarë bashkie apo këshille bashkiake.
Ju informoj se në PD janë depozituar prej kohësh një numër i madh kandidaturash sipas statutit të PD, shumë shpejt do deklarojmë edhe kandidaturat për të gjitha bashkitë që do jenë të gatshëm për të garuar në zgjedhjet e 14 majit.
Ne kemi zhvilluar mbledhje në selinë e PD-së në Durrës, në Tiranë e zhvillojmë sot në Fier, mbledhja tjetër do jetë në Lezhë për të treguar se ne jemi në paradhomë të fushatës zgjedhore dhe është e udhës që demokratët duhet të dalin në terren, është edhe taktikë për të pasur kontakte më intensive me demokratët kudo ku janë. Në të gjithë këtë lëvizjen tonë të PD-së nuk duam e nuk e kemi bërë lëshimin e sinjaleve provokative ndaj askujt! Ne jemi PD, beteja jonë është me regjimin, aleatët tanë janë qytetarët.
Edhe mënyra se si kemi bërë tonën për të bërë fushatë, është të gjejmë aleatët me qytetarët e ndershëm. Me shpresën për të bërë që ata të qëndrojnë këtu. Regjimi rrëzohet duke bërë qytetarët bashkë. Qytetarët bëhen bashkë duke dhënë shpresë, modelin që ky vend do duhet të bëhet nga njerëzit pa një të shkuar të dyshimtë. Me njerëz që kanë treguar që e duan këtë vend, pa lidhje me korrupsionin, pa lidhje me krimin, pa lidhje me oligarkinë. Është detyrimi më minimal./m.j
