Enkelejd Alibeaj ka prezantuar programin elektoral të partisë “Djathtas 1912”për zgjedhjet e 11 majit. Nga taksa e sheshtë, siguri për biznes, mbështetje për produktet “made in Albania”, si dhe paketë në ndihmë për pensionistët dhe familjet në nevojë.
“Ne jemi të bindur tek aplikimi i taksës së sheshtë mbi kapitalin, mbi të ardhurat nga puna. Ne jemi të qëndrimit që të ketë zero tatim për pagat deri në 60 mijë lekë. Bizneset që qarkullojnë deri në 20 milionë lekë në vit do të quhen biznese të vogla, të cilat do të kenë zero taksë. Zero taksë për profesionet e lira.
TVSH-ja e produkteve të shportës do të ulet nga 20 përqind që është sot në 10 përqind. Ulja e taksës për shitjen e pronës nga 15 përqind në 5 përqind. Uljen e çmimit të karburantit, thjesht, duke hequr çdo taksë nga çmimi.
Ne jemi për anulimin e të gjitha atyre ligjeve që krijojnë premisa për abuzim. Ligji për investitorin strategjik, ne jemi të pozicionit që një rregull bazë dhe i pashmangshëm është që koncesionet dhe prokurimet do të jepen vetëm me garë reale.
Paketa e solidaritetit për familjet e reja, nënat me shumë fëmijë, nënat kryefamiljare dhe kjo arrihet nëpërmjet kredive me zero interes për blerje banese, bonus për lindje fëmije”, tha ndër të tjera Alibeaj për programin e partisë “Djathtas 1912”.
Bashkë-themeluesi i “Djathtas 1912” Rezart Kthupi mbështetje shprehu edhe për Strukturën e Posaçme Anti-Korrupsion.
“Ne e kemi shprehur mbështetjen tonë edhe për SPAK”, tha ai, teksa premtoi në parlament njerëz pa hije korrupsioni mbi supe dhe pa pengje të së shkuarës komuniste.
“Nuk mund të jetë pazarxhi votash, nuk ka vend për mashtrues, hije korrupsioni e të shkuar të errët, e tundime të pushtetit, libër e hapur, histori e pastër e hije korrupsioni, çdo kush që ka kaluar derën e drejtësisë, nuk ka vend te ne”, tha Kthupi.
