Ndryshojnë rregullat për depozitimin dhe verifikimin e dokumentacionit të kandidimit dhe afatet për publikimin e listave të kandidatëve për deputetë, që do të konkurojnë në zgjedhjet e 18 qershorit.
Udhëzimi i ndryshuar, i propozuar nga administrata zgjedhore, parashikon që partitë politike brenda 70 ditëve nga mesi i muajit prill, duhet të dorëzojnë në KQZ listën shumëemërore të kandidatëve. Sipas këtij akti, partitë që nuk zotërojnë mandate në Kuvend, për të garuar në zgjedhjet e reja, duhet të mbledhin 5 mijë firma nga zgjedhësit.
Ato duhet të dorëzojnë pranë KQZ-së edhe listën e votuesve që mbështesin listat shumëemërore të partisë me emrat e jo më pak se 5 mijë votuesve.
Një tjetër ndryshim në udhëzimin e ndryshuar të KQZ-së parashikon që kandidatët për deputetë që kanë mandate në Kuvend, me anë të një vërtetimi nga parlamenti, i provojnë KQZ-se se kanë mandat në Kuvend të paktën 6 muaj.
Pra, ata deputetë që kanë zëvendësuar Shkëlqim Selamin dhe Dashamir Tahirin, të cilëve iu hoq mandati i deputetit për shkak të ligjit të dekriminalizimit, vërtetojnë se zotërojnë mandat 6 muajt e fundit nga dita e paraqitjes së kërkesës për regjistrim.
Udhëzimi, që pritet të miratohet te enjten, parashikon që kandidatet të plotësojnë dhe formularin e vetëdeklarimit, të cilin, së bashku me dokumentet e tjera ia dorëzojnë KQZ-se./b.d
