Kryeministri i Britanisë së Madhe, Boris Johnson deklaron se qeveria e tij po forcon masat e kontrollit kufitar për të mbrojtur vendin nga variantet e reja të koronavirusit.
Johnson bëri me dije se jan ë plot 22 vende që kanë rrezikun e mutacioneve të reja, duke përfshirë Afrikën e Jugut, Portugalinë dhe kombet e Amerikës së Jugut, raporton BBC.
Kryeministri britanik tha se për të ulur më tej rrezikun, kujtdo qytetari që nuk mund t’i refuzohet hyrja në Mbretërinë e Bashkuar, siç janë shtetasit britanikë, dhe që udhëtojnë nga këto vende rreziku, do t’u sigurohet strehim për 10 ditë që të qëndrojnë të izoluar, “pa përjashtime”.
Udhëtarët do të priten në aeroport dhe do të transferohen në hotele.
Siç tha ai, kthimi i studentëve në shkolla do të shkojë me uljen graduale të kufizimeve, në varësi të rrjedhës së vaksinimeve dhe zvogëlimit të rasteve.
“Ne nuk do të këmbëngulim për një ditë më shumë sesa është e nevojshme, por as nuk do të relaksohemi shumë shpejt,”– tha ai. ”Pamja e përgjithshme duhet të jetë më e qartë deri në mes të Shkurtit.”
Siç dihet, Britania ka marrë masa të ashpra që prej 4 janarit, pas rritjes së shpejtë të rasteve gjatë pushimeve, por edhe shfaqjes së “mutacionit britanik”, i cili sipas ekspertëve transmetohet më shpejt.
g.kosovari
