Mandati i të ndjerit Gjovalin Kadeli, ish-deputet i Partisë Demokratike, por i larguar prej saj për t’iu bashkuar Lëvizjes Socialiste për Integrim, do t’i kalojë një tjetër kandidati.
Edhe pse mandati i ish-deputetit skadon ligjërisht në muajin shtator, Kuvendi ka njoftuar vakancën në KQZ dhe ky institucion pritet t’i japë Partisë Demokratike një mandat në Lezhë.
Kadeli ishte numri 5 i PD-së në Lezhë dhe pasuesi i tij në listë është Artan Bushi. Por ky i fundit, në një shkresë drejtuar KQZ-së, ka refuzuar marrjen e mandatit që është i vlefshëm për një muaj, shkruan “Panorama”.
KQZ ka vijuar me pasuesin e listës së zgjedhjeve të 2009-ës, duke ia propozuar këtë mandat kandidatit të 7-të në listë që është Zef Maçi. Ky i fundit rezulton të jetë dënuar në vitin 2001 për pjesëmarrje në tubime të paligjshme, i dënuar me 5000 lekë gjobë, por sipas KQZ nuk e pengon të marrë mandatin e Gjovalin Kadelit.
ma.me
